မြို့ပတ်ရထားတိမ်းမှောက်၊ခရီးသည်၎ဦးဒဏ်ရာပြင်းထန်& စစ်ဖြစ်နေချိန် မြစ်ဆုံရေကာတာကို အရှိန်မြှင့်&ကော့သောင်း သဲတူးမှု ရွာများထိခိုက်

by စူ နာ မီ လှိုင်း on Friday, September 2, 2011 at 1:30am

->  ကန့်ကွက်မှုများသည့် မြစ်ဆုံစီမံကိန်း မှတ်တမ်းတင် ဗီဒီယိုဖြန့်ချိ
->  စစ်ဖြစ်နေချိန် ဧရာဝတီမြစ်ဆုံရေကာတာကို အရှိန်မြှင့်တည်ဆောက်နေ
->  စားကျက်မြေ သိမ်းပြီး လယ်နှင့် ပုဇွန်ကန် ဖေါ်ထုတ်မူ အရေးယူရန် မင်းပြား အမတ် လွှတ်တော်တင်

မြို့ပတ်ရထားတိမ်းမှောက်၊ ခရီးသည် ၄ ဦးဒဏ်ရာပြင်းထန်
************************************
ခိုင်သွယ် Thursday, 01 September 2011
ယနေ့ နေ့လယ် ၁ နာရီ ၅၅ မိနစ်အချိန်တွင် ရန်ကုန်မှ အင်းစိန်သို့ ပြေးဆွဲသော ခရီးသည်တင် မြို့ပတ်ရထား DD . 936 ၏ နောက်ဆုံး ရထားတွဲ တွဲချိတ်ပြုတ်ကျန်ခဲ့ပြီး တိမ်းမှောက် သွားသောကြောင့် ခရီးသည် ၄ ဦး ပြင်းထန်စွာ ဒဏ်ရာရရှိကြောင်း သိရသည်။


မြို့ပတ်ရထား တိမ်းမှောက်ပြီးနောက် တာဝန်ရှိသူများ စစ်ဆေးစဉ် (ဓာတ်ပုံ - ဧရာဝတီ)


“ရထားအ၀မှာ စီးလာတဲ့ အမျိုးသားကတော့ ဒဏ်ရာတော်တော်ပြင်းတယ်။ ရထားနဲ့ ပိနေလို့ ဆွဲထုတ်ရတာ။ ရထားပေါ်မှာ ထိုင်စီးတဲ့ သူတွေလည်း ထိပေမယ့် အဲဒီအမျိုးသား လောက်တော့ မပြင်းထန်” ဟု ကမာရွတ် ဘူတာရုံအနီးတွင် နေထိုင်သူ တဦးက ပြောသည်။

အဆိုပါ ရထားတိမ်းမှောက်မှုကြောင့် ဒဏ်ရာရရှိသော ခရီးသည်များမှာ အမျိုးသမီး ၁ ဦးနှင့် အမျိုးသား ၃ ဦးဖြစ်ကြောင်း၊ ယခုအခါ အဆိုပါ ဒဏ်ရာ ရရှိသူများအား ရန်ကုန်ဆေးရုံ အရေးပေါ်ဌာနသို့ ပို့ဆောင်ထားကြောင်း သိရသည်။

အဆိုပါ ဘူတာရုံအနီးတွင် နေထိုင်သော မျက်မြင်သက်သေများက ရထားလမ်းခင်းသော ဇလီဖားတုံးများ အလွန်အမင်း ဆွေးမြေ့ ပျက်ဆီးနေသောကြောင့် ထိုကဲ့သို့ တိမ်းမှောက်ရကြောင်း ပြောသည်။

“ကမာရွက်ဘူတာရုံနားက အနိမ့်ပိုင်းဆိုတော့ မိုးကြီးရင် ရေမြုပ်တယ်။ ဇလီဖာတုံးတွေနဲ့ သစ်တွေက ဆွေးကုန်ပြီ။ ပြုပြင်တာလည်း မရှိတော့ သံလမ်းကိုက မကောင်းတော့ဘူး” ဟုကမာရွတ် ဘူတာရုံအနီးတွင် ဈေးရောင်းနေသူ တဦးက
ဆိုသည်။

ထိုကဲ့သို့ ရထားတိမ်းမှောက်ပြီးနောက် ကျန်မြို့ပတ်ရထားများမှာ အချိန်ပြောင်း ပြေးဆွဲနေရကြောင်း သိရသည်။

ရန်ကုန် မြို့ပတ်ရထားလမ်းသည် မိုင် ၇၀ ခန့် ရှည်လျားပြီး နေ့စဉ်ခေါက်ရေ ၂၀၀ ကို ၅ မိနစ်ခြား ပြေးဆွဲနေကာ အဆိုပါ လုပ်ငန်းတွင် ဘူတာနှင့် ရပ်စခန်း ၇၇ ခု၊ ရထား ခေါင်းတွဲ ၂၅ တွဲ၊ လူစီးတွဲ ၉၀ တို့ ပါဝင်ကြောင်း ရထားပို့ဆောင်ရေး ဝန်ကြီးဌာနက ဆိုသည်။

ရန်ကုန်မြို့တွင်း ပြေးဆွဲနေသော မြို့ပတ်ရထားစုစုပေါင်း ၂၁ စီးရှိပြီး ဒီဇယ် စက်ခေါင်းနှင့် ၁၈ ခု၊ အာပီအီး စက်ခေါင်း ၃ ခု ရှိသည်ဟု သိရသည်။

ရန်ကုန်မြို့တွင်း ပြေးဆွဲနေသည့် မြို့ပတ်ရထားများသည် ဝန်ဆောင်မှု ညံ့ဖျင်းပြီး အရှုံးများစွာ ပေါ်နေကြောင်း၊ ထို့ကြောင့် ပုဂ္ဂလိက စီးပွားရေး လုပ်ငန်းရှင်များအား လုပ်ကိုင်ခွင့်ပေးရန် စီစဉ်နေကြောင်း ဇူလိုင် ၂၆ ရက်နေ့က နေပြည်တော်တွင် ကျင်းပသည့် အစည်းအဝေး၌ ရထားပို့ဆောင်ရေးဝန်ကြီး ဦးအောင်မင်းက ပြောခဲ့သည်။

အင်းစိန်မှ ရန်ကုန်ဘူတာကြီးသို့ မောင်းနှင်လာသည့် မြို့ပတ် ရထားအမှတ် (တ-၈) သည် ကမာရွတ် ဘူတာ
ကျော်လွန်ပြီးနောက် နောက်ဆုံးလူစီးတွဲ ပြုတ်ထွက်ပြီး လမ်းဘေးသို့ တိမ်းမှောက်ခဲ့ရာမှ အမျိုးသား ၃ ဦးနှင့်
အမျိုးသမီး ၁ ဦး ဒဏ်ရာရရှိခဲ့ခြင်း ဖြစ်သည်။ လမ်းချော်တိမ်းမှောက်ခဲ့သည့် ရထားတွဲအတွင်း လူဦးရေ ၂၀ ခန့်
သာ ပါဝင်ပြီး ထိခိုက် ဒဏ်ရာရသူများမှာ အင်းစိန် ဘူတာရုံပိုင်ကြီး ဦးကျော်ရွှေ (၅၆) နှစ်၊  ဦးရဲဝင်း (၅၇) နှစ်၊
ကိုလှဦး (၂၇) နှစ် နှင့် ဒေါ်နော်လီခင် (၄၉) နှစ်တို့ ဖြစ်သည်။


ရထားတွဲ တိမ်းမှောက်ခြင်းမှာ ပြင်ပ ပရောဂ မပါဘဲ သဘာဝအလျောက် ဖြစ်တာပါဟု ရန်ကုန်တိုင်း စစ်တိုင်းမှူးက သတင်းထောက်များကို ပြောကြားသည်။ ဓာတ်ပုံ- မဇ္ဈိမ။


ရန်ကုန်မြို့ပတ် ရထားတွဲ ကမာရွတ်နှင့် လှည်းတန်း ဘူတာအကြား တိမ်းမှောက်
တိမ်းမှောက်သွားသော ရန်ကုန်မြို့ပတ် ရထားတွဲကို ခရီးသည်များနှင့် အနီးပတ်ဝန်းကျင်လူများက ကြည့်ရှု့နေသည်ကို ကြာသပတေးနေ့ စက်တင်ဘာလ ၁ရက်၊ ၂၀၁၁ ခုနှစ်က တွေ့ရစဉ်။ ကမာရွတ် ဘူတာနှင့် လှည်းတန်း ဘူတာအကြား မွန်းလွဲ ၁ နာရီ ၅၅ မိနစ်က နောက်ဆုံးတွဲ ပြုတ်ကျကျန်ပြီး တိမ်းမှောက်မှု ဖြစ်ပွားသဖြင့် ခရီးသည် လေးဦး ဒဏ်ရာပြင်းထန်စွာ ရရှိသွားသည်။ ဓာတ်ပုံ- မဇ္ဈိမ။

ရထားတွဲ တိမ်းမှောက်ခြင်းမှာ ပြင်ပ ပရောဂ မပါဘဲ သဘာဝအလျောက် ဖြစ်တာပါဟု ရန်ကုန်တိုင်း စစ်တိုင်းမှူးက သတင်းထောက်များကို ပြောကြားသည်။ ဓာတ်ပုံ- မဇ္ဈိမ။

“ အင်းစိန်ကနေ ၁ နာရီ ၃၅ မိနစ်မှာ ထွက်လာတာ။ ကျနော်လဲ နောက်တွဲ ပြုတ်သွားတယ်ဆိုတာ သိသိခြင်း
ရထားကို ရပ်လိုက်တာပဲ။” ဟု ရထားစက်ခေါင်း မောင်းနှင်သူ ဦးဝင်းမင်းဦးက ပြောသည်။

အခင်းဖြစ်ပွားမှုကို မျက်မြင်ကြုံတွေ့ခဲ့သည့် အနီးဝန်းကျင် နေသူတဦးက “ ကျနော်တို့က ဈေးဆိုင်ထဲမှာ ထိုင်
နေတာ။ 'ဂလုံး' ဆိုပြီး အသံကြီးထွက်လာလို့ ကြည့်လိုက်တော့ ရထားကနေ တွဲတတွဲ ကျန်ခဲ့ပြီး သူက
တစောင်းကြီး ကိုက် ၁၅၀ လောက် ဆက်သွားနေပီးမှ လဲသွားတာ။ အဲ့တာ အနားက လူတွေက အားလုံးပြေးပြီး
လှေကားတွေ ခုံတွေရှာပြီး ခရီးသည်တွေ ဆွဲထုတ်ကြတာ။ ” ဟု ပြောသည်။

ရထားတွဲ တိမ်းမှောက်ရာသို့ ရန်ကုန်တိုင်း ဒေသကြီး ပို့ဆောင်ရေးဝန်ကြီး ဦးအောင်ခင်နှင့် စစ်တိုင်းမှူးတို့ပါ လာရောက်ခဲ့ပြီး ရန်ကုန်တိုင်း စစ်တိုင်းမှူးက ဖြစ်စဉ်မှာ ပြင်ပ ပယောဂကြောင့် ဖြစ်ခြင်း မဟုတ်ပဲ သဘာဝ အလျောက် ဖြစ်ပွားခြင်းဟု သတင်းထောက်များကို ပြောဆိုခဲ့ပြီး ဖြစ်ရပ်နှင့် ပတ်သတ်၍ အပြုသဘောဖြင့်
ရေးသားရန် သတင်းထောက်များကို ပြောသည်။


ရန်ကုန်မြို့ပတ် ရထားတွဲ ကမာရွတ်နှင့် လှည်းတန်း ဘူတာအကြား တိမ်းမှောက်
မြို့ပတ်ရထားတွဲ တိမ်းမှောက်မှုကြောင့် ဒဏ်ရရသွားခဲ့သော ခရီးသည် တဦးကို တိမ်းမှောက်သွားသော တွဲအနီး တွေ့ရစဉ် ။ ဓာတ်ပုံ- မဇ္ဈိမ။ကမာရွတ် ဘူတာနှင့် လှည်းတန်း ဘူတာအကြား မွန်းလွဲ ၁ နာရီ ၅၅ မိနစ်က နောက်ဆုံးတွဲ ပြုတ်ကျကျန်ပြီး တိမ်းမှောက်မှု ဖြစ်ပွားသဖြင့် ခရီးသည် လေးဦး ဒဏ်ရာပြင်းထန်စွာ ရရှိသွားသည်။ ဓာတ်ပုံ- မဇ္ဈိမ။


ရန်ကုန်မြို့ပတ် ရထားတွဲ ကမာရွတ်နှင့် လှည်းတန်း ဘူတာအကြား တိမ်းမှောက်
ရန်ကုန်ဘက်သို့ ပြန်ဝင်သော မြို့ပတ်ရထား (စက်ခေါင်းအမှတ် DT-၉၃၆) သည် ကြာသပတေးနေ့ မွန်းလွဲ ၁ နာရီ ၅၅ မိနစ်က ကမာရွတ်ဘူတာနှင့် လှည်းတန်းဘူတာ အကြားတွင် နောက်ဆုံးတွဲက ပြုတ်ထွက်ပြီး တိမ်းမှောက်မှု ဖြစ်ပွားသဖြင့် ခရီးသည် လေးဦးပြင်းထန်စွာ ဒဏ်ရာရရှိသွားသည်။ ဓာတ်ပုံ- မဇ္ဈိမ

မြစ်ဆုံစီမံကိန်း တရုတ် အရှိန်မြှင့်လုပ်ဆောင်နေ
******************************
ကြာသပတေးနေ့၊ စက်တင်ဘာလ 01 ရက် 2011  စောခါးစူး - ကေအိုင်စီ
ကချင်ပြည်နယ်တွင် မြန်မာစစ်တပ်နှင့် ကချင်လွတ် မြောက်ရေးတပ်မတော်-KIA အကြား စစ်ပွဲများ ဖြစ်ပွားနေသည့်တိုင် တရုတ် ကုမ္ပဏီဘက်မှမြစ်ဆုံ ရေကာတာ တည်ဆောက်ရေးကိုအရှိန်မြှင့် လုပ် ဆောင်နေသည်ဟုကချင်လူမှုဖွဲ့ဖြိုးရေး ကွန်ယက် အဖွဲ့-KDNG ၏ ထုတ်ပြန်ချက်တွင် ဖေါ်ပြထားသည်။


တရုတ်နိုင်ငံ၏ အကြီးမားဆုံး ရေကာတာတည်ဆောက်ရေးအဖွဲ့ ဆိုင်နိုဟိုက်ဒရိုကော်ပိုရေးရှင်း (Sinohydro Corporation) ကုမ္ပ ဏီသည် တိုက်ပွဲများ စတင် ဖြစ်ပွားခဲ့သည့် ဇွန်လတွင် ရပ်ဆိုင်းထားခဲ့သော ၎င်းတို့၏ ဆောက်လုပ်ရေးလုပ်ငန်းများကို တလကျော် အကြာတွင် ပြန်ရောက်လာပြီး လုပ်သား ၇၀၀ကျော်ဖြင့် နေ့ရောည ပါ အလုပ်လုပ်နေကြသည်ဟု အဆိုပါအဖွဲ့က ထောက်ပြထား သည်။
KDNG အဖွဲ့၏ ပြောခွင့်ရပုဂ္ဂိုလ် အားနန်က “ဒီတရုတ်ကုမ္ပဏီက ပထမအဆင့် ကန်ထရိုက်ရထားတယ်။ သူတို့ ဒီနှစ်အတွင်း ပထမ အဆင့် ပြီးအောင်လုပ်မယ်လို့ တရားဝင် ထုတ်ပြန်ထားတယ်။”ဟု ကေအိုင်စီကို ပြောသည်။

၂၀၀၄ခုနှစ်တွင် စတင် ဖွဲ့တည်ထောင်ခဲ့သည့် ကချင်လူမှုဖွံ့ဖြိုးရေးကွန်ယက်အဖွဲ့-KDNG သည် လူမှုရေးနှင့် ဖွံ့ဖြိုးရေးကိစ္စတို့ကို ဆောင်ရွက်လျက်ရှိသည့်အဖွဲ့ ဖြစ်သည်။မေလအတွင်းက ထုတ်ဝေဖြန့်ဝေခဲ့သည့် “ခက်ခဲပြင်းထန်သော မြစ်ကြီးနားတိုက်ပွဲ”အမည်ရှိဆိုင်နိုဟိုက်ဒရို ကော်ပိုရေးရှင်း ကုမ္ပဏီ ၏ ဗွီဒီယိုမှတ်တမ်းခွေတွင် မြစ်ဆုံရေကာတာစီမံကိန်းနှင့် ပတ်သက်၍ နှောင့်နှေး ကြန့်ကြာစေမည့် မည်သည့်အခက်အခဲ အနှောက် အယှက်မဆို ၎င်းတို့ ကျော်လွှားသွားမည်ဟုဖော်ပြထား ခဲ့သည်။ထို့အပြင် ၎င်းတို့အနေဖြင့် ရေကာတာကို ဇူလိုင်လနှင့် ဩဂုတ်လအတွင်း တည်ဆောက်သွားမည်ဟုလည်း ထုတ်ပြန်ထားကြောင်း KDNG အဖွဲ့က ပြောသည်။

တရုတ်ကုမ္ပဏီ၏ ရေကာတာစီမံကိန်းအပေါ် KDNG က အရေးပေါ် သတင်းထုတ်ပြန်ချက်တစောင်လည်း ထုတ်ပြန်ခဲ့ပြီး ထုတ်ပြန် ချက်အရ တရုတ်အလုပ်သမားများသည် အလုပ်ပြန်ဆင်းပြီးနောက်စီမံကိန်းနေရာ များ တွင် တောင်ကတုံးများဖြစ်သည်အထိ ခုတ် ထွင်ရှင်းလင်းခြင်း၊ မြောင်းများ တူးဖော်ခြင်းနှင့်တမံတုတ် ခြင်း များကို လုပ်ဆောင်နေသည်ဟု ဖော်ပြထားသည်။
မြန်မာအစိုးရအနေဖြင့် မြစ်ဆုံရေကာတာ တည်ဆောက်ရေးစီမံကိန်း ပြန်လည်သုံးသပ်ရန်  ဒေါ်အောင် ဆန်းစုကြည်က ထုတ်ပြန် ချက်ထုတ်ကာ တောင်းဆိုထားသလို အစိုးရဘက်မှ ပြန်ကြားရေးဝန်ကြီး ဦးကျော်ဆန်းကလည်း ဧရာဝတီမြစ်ကို ကာကွယ်မည်ဖြစ် ကြောင်း၊ ယခုလဆန်းပိုင်း နေပြည်တော်၌ ပြုလုပ်သည့် သတင်းစာရှင်းလင်းပွဲတွင် ပြောဆိုခဲ့သည်။

စီမံကိန်း တည်ဆောက်ရေးနေရာကို KIA တပ်များ မတိုက်ခိုက်နိုင်ရန် မြန်မာအစိုးရက လုံခြုံရေး အပြည့်အ၀ ချထားပြီး လူဝင်လူ ထွက်ကိုလည်း တားမြစ်ထားသည်ဟု KDNG ၏ ပြောဆိုချက်အရ သိရသည်။မြစ်ဆုံရေကာတာတည်ဆောက်ရေးတွင် လမ်းတံတားတည်ဆောက်ရေး၊ သံတမံတည်ဆောက်ရေးနှင့် ရေမြောင်းတူးဖော်ရေး အပါ အ၀င် ဆောက်လုပ်ရေး ၈ခုရှိပြီး ပထမအဆင့် တည်ဆောက်သည့်မြစ်ဆုံရေ ကာတာသည် မြစ်ကြီးနားမြို့၏ မြောက်ဘက် ကီလိုမီ တာ ၄၀ (၂၇မိုင်) တည်ရှိသည်ဟု KDNG က ပြောသည်။

မြစ်ဆုံရေကာတာ စီမံကိန်းကို ၂၀၀၅ခုနှစ်တွင် မြန်မာနှင့် တရုတ်အစိုးရတို့က သဘောတူညီမှုရရှိပြီးလျှပ်စစ် စွမ်းအားစုစုပေါင်း ၁၃,၃၆၀မဂ္ဂါဝပ် ထုတ်လုပ်မည် ဖြစ်သည်။ မြစ်ဆုံရေကာတာ စီမံကိန်းအတွက်တရုတ် နိုင်ငံက အမေရိကန် ဒေါ်လာဘီလျံ ၂၀ ရင်း နှီးမြှုပ်နှံမည်ဖြစ်ပြီး မြန်မာနိုင်ငံအဖို့ ရင်းနှီးမှုအကြီးမား ဆုံး စီမံကိန်းတစ်ခုလည်း ဖြစ်သည်။

စစ်ဖြစ်နေချိန် ဧရာဝတီမြစ်ဆုံရေကာတာကို အရှိန်မြှင့်တည်ဆောက်နေ
********************************************
ကြာသပတေးနေ့၊ စက်တင်ဘာလ 01 ရက် 2011 - ကချင်သတင်းဌာန
တရုတ်သမ္မတ ဟူကျင်တောင်နှင့် ၎င်းအစိုးရမှတည်ဆောက်နေသည့် ဧရာဝတီမြစ်ဆုံရေကာတာ။ကချင်ပြည် နယ်တွင်း တိုက်ပွဲများဖြစ်ပွားနေသော်လည်း ဧရာဝတီမြစ်ဆုံစီမံကိန်း ရပ်တန့်ခြင်းမရှိဘဲ အရှိန်မြှင့်ဆောက် လုပ်နေကြောင်း သြဂုတ် (၃၁)ရက် ထုတ် ကချင်လူမှုဖွံ့ဖြိုးရေးကွန်ယက်အဖွဲ့ (KDNG)၏ အရေးပေါ် ကြေညာချက်တွင် ဖော်ပြသည်။


တရုတ်သမ္မတ ဟူကျင်တောင်နှင့် ၎င်းအစိုးရမှတည်ဆောက်နေသည့် ဧရာဝတီမြစ်ဆုံရေကာတာ။

တရုတ်အစိုးရပိုင် CPI (China Power Investment Corporation)နှင့် မြန်မာနိုင်ငံမှ Asia World Company အလုပ်သမားများအပြင် ယခု ကမ္ဘာ့အကြီးဆုံး တရုတ်နိုင်ငံပိုင် Sinohydro Corporation မှ အလုပ်သမား (၇၀၀) ထပ်မံဝင်ရောက်လာပြီး မြစ်ဆုံရေကာတာကို အရှိန်မြှင့်လုပ်ဆောင်နေသည်ဟု KDNG (Kachin Development Networking Group) မှ မ အားနန် ပြောသည်။

စီမံကိန်းအတွက် လိုအပ်သော စက်ယန္တရားနှင့် ဆောက်လုပ်ရေးကုန်ပစ္စည်းများကို ကချင်ပြည်နယ် အရှေ့ဘက် တရုတ်နယ်စပ် ကန်ပိုင်တီမှတဆင့် (၁၂) ဘီးကားကြီးများဖြင့် တင်သွင်းနေသည်ကို တွေ့မြင်နေရသည်ဟု ကန်ပိုင်တီ ဒေသခံ တစ်ဦးက ပြောသည်။
သို့သော် ဇွန် (၉) ရက် မြန်မာအစိုးရစစ်တပ်နှင့် ကချင်လွတ်မြောက်ရေးတပ်ဖွဲ့ (KIA) ကြားတိုက်ပွဲဖြစ် ပွားပြီးနောက်ပိုင်း မြစ်ကြီးနား-ကန်ပိုင်တီ လမ်းပိုင်းရှိ KIA တပ်စခန်းများက ဆောက်လုပ်ရေးနှင့်ပတ်သက် သော ဆက်စပ်ပစ္စည်းများ တင်ဆောင်သည့်ကားများကို ဖြတ်သန်းခွင့်မပြုကြောင်း ဒေသခံကုန်သည် ယာဉ်မောင်းများမှတဆင့် သိရသည်။

ဇွန် ၁၄ ရက် ယင်းလမ်းကြောင်းရှိ တံတား ၁ စင်းကို KIA က ဗုံးခွဲဖျက်ဆီးခဲ့သော်လည်းလုံးဝပျက်စီး သွားခြင်း မရှိခဲ့ပေ။
ကန်ပိုင်တီ-မြစ်ကြီးနားလမ်းသည် ယွမ်ငွေ (၉၇) သန်းအကုန်အကျခံကာ တရုတ်နိုင်ငံ ယူနန်ပြည်နယ်မှ ကုမ္ပဏီများက တည်ဆောက်ပေးခဲ့သည့် လမ်းဖြစ်သည်။ လမ်းဖောက်ပြီးလျှင် မြန်မာအစိုးရဘက်မှလမ်းဖြတ် သန်းခ ကောက်ခံခြင်းမပြုရန် တရုတ်ကုမ္ပဏီများက တောင်းဆိုခဲ့သည်ဟု ထိုစဉ်ကစကားပြန်ပြု လုပ်သူ တရုတ်အမျိုးသားတစ်ဦးထံမှ သိရသည်။

မြစ်ဆုံစီမံကိန်းကို ဆက်လက်အကောင်အထည်သွားမည်ဆိုပါက ပြည်တွင်းစစ်ဖြစ်လာနိုင်သည်ဟု ကချင် လွတ်မြောက်ရေးအဖွဲ့ (KIO)က တရုတ်သမ္မတ ဟူကျင်တောင် ထံ ပြီးခဲ့သည့် မတ်လက အိတ်ဖွင့်ပေးစာ ပေးပို့ခဲ့သေးသည်။တရုတ် CPI မှ အမေရိကန်ဒေါ်လာ ၃.၆ ဘီလီယံ အကုန်ကျခံကာ ပေ ၅၀၀ အမြင့်ရှိ မြစ်ဆုံရေကာတာကို ၂၀၀၉ ဒီဇင်ဘာမှ စတင်တည်ဆောက်နေခြင်းဖြစ်သည်။ ၎င်းမှ ထွက်လာမည့် လျှပ်စစ်အား ၆၀၀၀ မဂ္ဂါဝပ်၏ အများစုကို တရုတ်ပြည်သို့ ရောင်းချမည်ဖြစ်သည်

ကော့သောင်း သဲတူးမှု ကျေးရွာများ ထိခိုက်
***************************
သန်းထိုက်ဦး Thursday, 01 September 2011
တနင်္သာရီတိုင်း ကော့သောင်း ရေပိုင်နက်အတွင်း သင်္ဘောကြီးများဖြင့် သဲတူးဖော်ရေ လုပ်ငန်းများ ပြုလုပ်နေသောကြောင့် ကျွန်းစုများတွင် နေထိုင်လျက်ရှိသော ကျေးရွာများ ဘေးအန္တရာယ်နှင့် ရင်ဆိုင်နေရကြောင်း သိရသည်။


တနင်္သာရီတိုင်း ကော့သောင်းရေပြင်မှ သဲတူး သင်္ဘော

စင်ကာပူနိုင်ငံမှ ကုမ္ပဏီများက သဲတန်ချိန် ၁ သိန်း နီးပါးခန့် တင်ဆောင်နိုင်သည့် သင်္ဘောကြီး ၅ စီး၊ သဲတူး သင်္ဘော ၈ စီးတို့ဖြင့် ပါချန်နှင့် တနင်္သာရီမြစ်ဆုံတွင် ပြီးခဲ့သော ဇူလိုင်လမှ စတင်၍ တူးဖော်ခဲ့ကြောင်း ကော့သောင်း အခြေစိုက် သဘာဝ ဘေးအန္တရာယ် ကာကွယ်တားဆီးရေး ကွန်ရက်အဖွဲ့က ပြောကြားသည်။လတ်တလော သဘာဝ ဘေးအန္တရာယ်နှင့် ရင်ဆိုင်နေသည့် ကျေးရွာများနှင့်ပတ်သက်၍ နေပြည်တော်ရှိ အစိုးရ အာဏာပိုင်များထံ ကန့်ကွက်စာပေးပို့ရန် စီစဉ်ထားကြောင်း ယင်းကွန်ရက်အဖွဲ့မှ တာဝန်ခံ ဦးမြင့်သိန်းက ဧရာဝတီသို့ ပြောသည်။

ယင်း သဲတူးဖော်ရေး လုပ်ငန်းများကြောင့် ရေအောက် ချိုမ့်ဝှမ်းအတွင်းသို့ အစားထိုးနွံများ၊ သဲများ စီးဆင်နေသဖြင့် ကော့သောင်းမြို့နယ်မှ စက်လှေဖြင့် မိနစ် ၂၀ ခန့် သွားရသည့် ခရုကျွန်း (ခေါ်) ရွာသာရွာ၊ သီရိမြိုင်ရပ်ကွက်၊ ဘုရင့်နောင် ရပ်ကွက်၊ ပုလိုတုံတုံးကျေးရွာ၊ ဆလုံကျွန်း၊ ရွှေပြည်စိုး ကျေးရွာအုပ်စု တို့တွင် ကမ်းပါးပြိုမှု၊ သဲသောင်ပျက်စီးမှုများ ဆိုးဆိုးရွားရွား ကြုံတွေ့နေရခြင်း ဖြစ်ကြောင်း သိရသည်။သဲသောင်များဖြင့် ၀န်းရံထားသော ရွာသာရွာသည် အိမ်ခြေ ၁၂၀၊ လူဦးရေ ၄၀၀ ကျော် ရှိပြီး ငါးဖမ်းလုပ်ငန်းဖြင့် အသက်မွေးကြသော ကျွန်းစုကလေး ဖြစ်သည်။

“ရွာလေးက အရင် သူတို့ မိရိုးဖလာ လှေငယ်လေးတွေနဲ့ တပိုင်တနိုင် လုပ်စားကြတယ်။ နောက်တော့ အသက်မွေးဝမ်းကြောင်းလည်း ပျက်စီးတဲ့ ပုံစံမျိုးတွေ ဖြစ်သွားတယ်” ဟု ကော့သောင်းဒေသခံ ကိုတိုးက ပြောသည်။ယင်းကျေးရွာသည် သဲတူးဖော်နေသည့် သင်္ဘောကြီးများ၏ လုပ်ကွက်နှင့် အလွန်နီးကပ်သောကြောင့် သဲခုံများ ၄ ပေခန့် နိမ့်ဆင်းသွားကြောင်း သိရသည်။

“သဲတွေကို ပိုက်အကြီးနဲ့ စုပ်တယ်ဆိုတော့ အောက်က ငါးတွေလည်း မခံနိုင်ဘူး။ တော်တော်များများ ငါးတွေလည်း ပျောက်ကုန်ပြီ” ဟု ကိုတိုးက ဆိုသည်။ပင်လယ်ရေ သတ္တ၀ါများ နားခိုကျက်စားရာ သန္တာကျောက်တန်းများ ပျက်စီးသွားသောကြောင့် ငါး၊ ပုဇွန်၊ ဂဏန်းနှင့် တခြားရေသတ္တ၀ါများ ရှားပါးပျောက်ကွယ်သွားပြီး ရေလုပ်ငန်းများဖြင့် ရပ်တည်နေသော ဒေသခံများလည်း ၀မ်းစာအတွက် တနေ့တခြား ခက်ခဲလာကြောင်း သဘာဝ ဘေးအန္တရာယ် ကာကွယ်တားဆီးရေး ကွန်ရက်အဖွဲ့က ပြောသည်။

သဲခုံပေါ်တွင် ဆောက်လုပ်ထားသည့် အိမ်ခြေ ၅ လုံးခန့် ပျက်စီးမည့် အခြေအနေသို့ ရောက်ရှိနေပြီး အင်္ဂတေဖြင့် ခိုင်မာစွာ ဆောက်လုတ်ထားသော နတ်စင်လည်း ပြိုကျနေကြောင်း သိရသည်။ ယခုအခါ ကမ်းခြေရှိ သဲခုံ အနေအထားများကြောင့် သဘာဝဘေး အန္တရာယ်နှင့် ရင်ဆိုင်ရလာနိုင်သည်ဟု ယူဆပြီး ကျေးရွာဒေသခံများက စိုးရိမ်နေကြသည်။
သဘာဝ ဘေးအန္တရာယ် ကာကွယ်တားဆီးရေး ကွန်ရက်အဖွဲ့က မြစ်ကြောင်းများ ထိမ်းသိမ်းခြင်းဆိုင်ရာ ဥပဒေများကို ပိုမိုထိရောက်စွာ ထိမ်းသိမ်းလိုက်နာကြရေးအတွက် အာဏာပိုင်များ၊ သဘာဝပတ်ဝန်းကျင်ဆိုင်ရာ ကျွမ်းကျင်သူများအနေဖြင့် တတ်နိုင်သည့်ဘက်မှ ကူညီရန် တိုက်တွန်းထားသည်။

မြန်မာနိုင်ငံသည် စင်ကာပူနိုင်ငံအတွက် လိုအပ်သော သဲများကို ၂၀၀၇ ခုနှစ် နောက်ပိုင်းမှစ၍ အဓိက ထောက်ပံ့ပေးနေခဲ့သည်။
ကမ္ဘောဒီးယားနိုင်ငံသည်လည်း ယင်းကမ်းရိုးတမ်းမှ သဲများကို စင်ကာပူသို့ ရောင်းချနေပြီး သဘာဝပတ်ဝန်းကျင်ကို ထိခိုက်မှုကြောင့် ပြည်တွင်း လူမှုရေးအဖွဲ့များက ဝေဖန်နေကြသည်။မလေးရှား၊ အင်ဒိုနီးရှားနှင့် ဗီယက်နမ်နိုင်ငံတို့က သဘာဝပတ်ဝန်းကျင် ထိခိုက်မှုများကြောင့် ယင်းနိုင်ငံတို့၏ ကမ်းရိုးတမ်းများမှ သဲများရောင်းချခြင်းကို ရပ်ဆိုင်းခဲ့သည်။

စားကျက်မြေ သိမ်းပြီး လယ်နှင့် ပုဇွန်ကန် ဖေါ်ထုတ်မူ အရေးယူရန် မင်းပြား အမတ် လွှတ်တော်တင်
**************************************************************
ကြာသပတေးနေ့၊ စက်တင်ဘာလ 01 ရက် 2011 - လွတ်လပ်သော မွန်သတင်းအေဂျင်စီ
ယမန်နေ့က ကျင်းပသော ပြည်သူ့ လွှတ်တော်တွင် RNDP ပါတီ မင်းပြားမြို့နယ် ပြည်သူ့ လွှတ်တော် အမတ် ဦးအောင်စိန်သာက နွားစားကျက်မြေများကို သိမ်းပြီး လယ်မြေနှင့် ပုဇွန်ကန် ဖေါ်ထုတ်နေမူ အရေး ကိစ္စကို တင်ပြဆွေးနွေးခဲ့သည်ဟု သတင်း ရရှိသည်။မြေပုံမြို့နယ် ပြည်သူ့လွှတ်တော် အမတ် ဦးဖေသန်းက ဦးအောင်စိန်သာ၏ မေးမြန်းချက်နှင့် ပတ်သက်ပြီး ယခုလို ပြောသည်။


နွားစားကျက်မြေများကို ရခိုင်တွင် ရွာဘုံ အဖြစ် ထားလေ့ရှိသည်။ ယခုအခါ စစ်တပ်က သိမ်း၍ စားကျက်မြေများ မကျန်တော့ပါ။( ဓါတ်ပုံ- နိရဉ္စရာ)

" ဦးအောင်စိန်သာက စိုက်ပျိုးရေး ကဏ္ဍမှာ ကျွဲနွားတွေ စားကျက်မြေတွေ တောင်သူ လယ်သမားတွေ အတွက် အရေးကြီးတယ်။ အခု အဲဒီ စားကျက်မြေတွေကို မြန်မာနိုင်ငံ တ၀န်းလုံးမှာ စီးပွားရေး သမားတွေက ဒေသခံဆိုင်ရာ အာဏာပိုင်တွေနဲ့ ပူးပေါင်းပြီး လယ်ယာမြေတွေ၊ ပုဇွန် မွေးမြူရေး ကန်တွေဖေါ်ထုတ်နေကြ တယ်။ ဒါကို နိုင်ငံတော် အနေနဲ့ သိပါသလား။ အဲသလို လုပ်နေတာကို ဘယ်လို အရေးယူဆောင်ရွက်ပေး မလဲဆိုတာကို မေးမြန်းခဲ့ပါတယ်" ဟု ပြောသည်။

၎င်းပြင် ဦးအောင်စိန်သာက ရခိုင်ပြည်နယ် အတွင်းရှိ စားကျက်မြေ ဧရိယာနှင့် လက်ရှိ စားကျက်မြေများကို သိမ်းယူပြီး လယ်မြေ ဖေါ်ထုတ်မူနှင့် ပုဇွန်ကန် ဖေါ်ထုတ်နေမူ ဧရိယာများကို သိလိုကြောင်းမေးမြန်းခဲ့ သည်ဟု သိရသည်။
ဦးအောင်စိန်သာ၏ မေးမြန်းတင်ပြမူ အပေါ် လယ်ယာစိုက်ပျိုးရေးနှင့် ဆည်မြောင်းဝန်ကြီး ဦးမြင့်လိူင်မှ ယခုလို ပြန်လည် ဖြေကြားခဲ့သည်ဟု သူက ပြောသည်။

" ၀န်ကြီး ဦးမြင့်လိူင်က သူတို့အနေနဲ့ သိထားပါတယ်လို့ ပြောပါတယ်။ နောင် တချိန်ချိန်မှာ ဒီကိစ္စ အပေါ် အသေအချာ စိစစ်ပြီး အရေးယူဆောင်ရွက်ပေးသွားမယ်လို့ ပြောဆိုသွားပါတယ်" ဟု ပြောသည်။ အဆိုပါ ဦးအောင်စိန်သာ၏ မေးခွန်းအပေါ်   ပြည်ထဲရေးဝန်ကြီး ဦးကိုကိုမှ ဖြေကြားရမည် ဖြစ်သော်လည်း ပြည်ထဲရေး ၀န်ကြီး မရောက်သဖြင့် ဦးမြင့်လိူင်မှ သူ့ကိုယ်စား ဖြေကြားသွားခြင်း ဖြစ်ကြောင်း ဦးဖေသန်းက ဆက်ပြောသည်။

" စားကျက်မြေက ပြည်ထဲရေး ၀န်ကြီးဌာန လက်အောက်မှာ ရှိတာ ဖြစ်ပါတယ်။ ဒါပေမယ့် ပြည်ထဲရေး ၀န်ကြီး ဦးကိုကို မရောက်တော့ ဦးမြင့်လိူင်က ကိုယ်စား ဖြေကြားသွားတာ ဖြစ်ပါတယ်။"ရခိုင်ပြည်နယ်တွင် နွားစားကျက်မြေ အများအပြားကို သိမ်းယူထားသည်မှာ စစ်တပ် တပ်ရင်းများ ဖြစ်ပြီး စစ်တပ်မှ သိမ်းယူထားသော စားကျက်မြေများကို စစ်တပ်ပိုင် လယ်မြေ အဖြစ် ဖေါ်ထုတ်ကာ အများအပြားကို ရခိုင်လယ်သမားများကို သီးစားချထားပြီး ကျန်မြေများကို ဒေသခံ စီးပွားရေး သမားများသို့ရောင်းချထား ကြောင်း သိရသည်။အများစု စားကျက်မြေများမှာ ရွာသားများ ဘုံပိုင်ဆိုင်သော မြေဖြစ်ပြီး မြေစာရင်းဌာနတွင် ပိုင်ဆိုင်မူ စာရင်း ဖေါက်ထား၍ မရှိသဖြင့် စစ်တပ်က အလွယ်တကူ သိမ်းယူကာ လယ်မြေများ၊ ပုဇွန်ကန်များဖေါ်ထုတ်ထား ကြောင်း သိရသည်။

ကန့်ကွက်မှုများသည့် မြစ်ဆုံစီမံကိန်း မှတ်တမ်းတင် ဗီဒီယိုဖြန့်ချိ
****************************************
ကြာသပတေးနေ့၊ စက်တင်ဘာလ 01 ရက် 2011 - မဇ္ဈိမသတင်းဌာန
ချင်းမိုင်(မဇ္စျိမ) ။      ။ လူပြော သူပြောများကာ ကန့်ကွက်ခံနေရသည့် မေခ၊ မလိခမြစ် ဆုံရာတွင် တည်ဆောက် မည့် မြစ်ဆုံရေကာတာ စီမံကိန်းနှင့် ပတ်သက်ပြီး ယင်းဆည်ကို တာဝန်ယူဆောက်လုပ် နေသည့် တရုတ် ကုမ္ပဏီမှ ရိုက်ကူး ဖြန့်ချိထားသော မှတ်တမ်းတင် ဗီဒီယိုတခုကို ကချင်လူမှုဖွံ့ဖြိုးရေး ကွန်ယက်အဖွဲ့ KDNG က မြန်မာဘာသာ သို့ပြန်ဆို၍ ကြာသပတေးနေ့က ထုတ်ပြန်လိုက်သည်။
တရုတ်နိုင်ငံ လျှပ်စစ်ဓါတ်အား ရင်းနှီးမြှပ်နှံမှု ကော်ပိုရေးရှင်း CPI ကုမ္ပဏီ၏ ဆိုင်နိုဟိုက်ဒရို ကော်ပိုရေးရှင်း Sinohydro Corporation ဌာနခွဲ ၁၁ မှ  “ခက်ခဲပြင်းထန်သော မြစ်ကြီးနားတိုက်ပွဲ” အမည်ဖြင့် မြစ်ဆုံ ရေကာတာ စီမံကိန်း လုပ်ငန်း စတင်အကောင်အထည် ဖော်နေမှုများကို ပြီးခဲ့သည့် မေလကဗီဒီယိုမှတ်တမ်း တခု ရိုက်ကူးပြီး တရုတ်ဘာသာဖြင့် ဖြန့်ချိထားသည်။

ထိုမှတ်တမ်းပါ မေးမြန်းချက် အချို့ကို အင်္ဂလိပ်နှင့် မြန်မာနှစ်ဘာသာဖြင့် စာတမ်း ထိုးပေးထားပြီး မြစ်ဆုံ ရေကာတာဆောက်လုပ်ရေး ပထမဆင့်ကို ယခုနှစ်အတွင်း အပြီးသတ် လုပ်ဆောင်ရန် စာချုပ် ချုပ်ဆိုထားပြီး ဖြစ်သည်ဟု ယင်းမှတ်တမ်း ဗီဒီယိုကို KNDG ၏ ဝဘ်ဆိုဒ်တွင်လည်း ထပ်မံ ဖော်ပြထားသည်။


မြစ်ဆုံရေကာတာ စီမံကိန်းနှင့် ပတ်သက်ပြီး တရုတ် ကုမ္ပဏီမှ ရိုက်ကူး ဖြန့်ချိထားသော မှတ်တမ်းတင် ဗီဒီယို တခုကို ကချင်လူမှုဖွံ့ဖြိုးရေး ကွန်ယက်အဖွဲ့ KDNG က မြန်မာဘာသာ သို့ပြန်ဆို၍ ထုတ်ပြန် (Photo KDNG)

မြစ်ဆုံရေကာတာ စီမံကိန်း၏ ပထမဆင့်အဖြစ် ဆိုင်နိုဟိုက်ဒရို ကော်ပိုရေးရှင်းမှ အလုပ်သမား ၇ဝဝ က တူးမြောင်း တူးခြင်း၊ မြောင်းဖောက်ခြင်း၊ တံတား၊ လမ်းဖောက်လုပ်ခြင်း စသည့် ဆောက်လုပ်နေရာ လုပ်ငန်း ၈ ခု လုပ်ကိုင် ရမည် ဖြစ်သည်။

တရုတ် အလုပ်သမားများ၊ အင်ဂျင်နီယာများ၊ စီမံအုပ်ချုပ်ရေးမှူးများ အားလုံးက မြစ်ဆုံရေကာတာ ဆောက်လုပ်ရေး လုပ်ငန်းခွင်ထဲ အပြင်းအထန် လုပ်ကိုင်နေပြီ ဖြစ်ပြီး ဌာနအနေဖြင့် တရုတ်လူငယ်များကို လုပ်ငန်း အကျိုး သက်ရောက်မှု ရှိရန်အတွက် စည်းစနစ်ကျသော စီမံခန့်ခွဲမှုများနှင့် အတူ အလုပ်အကိုင် အခွင့်အလမ်းများပေးခြင်းနှင့် သင်တန်းများပေးနိုင်သည်ဟု မှတ်တမ်းအရ သိရသည်။

CPI ကုမ္ပဏီ၏ အတွင်းရေးမှူးနှင့် မြစ်ဆုံစီမံကိန်း၏ လက်ထောက် ညွှန်ကြားရေးမှူးဖြစ်သူ Dong Kequan က “စနစ်ကျတဲ့ ဦးဆောင်မှုအောက်မှာ ကျနော်တို့ ဒီဧရာဝတီစီမံကိန်းကို အချိန်မီ လုပ်ဆောင်ခြင်းနဲ့ တရုတ် ရေအား လျှပ်စစ် စီမံကိန်းကို ပုံရိပ်ကောင်းပေါ်စေပြီး မြန်မာနိုင်ငံမှာ ဈေးကွက်တွေ ထပ်ချဲ့သွားမယ်”ဟု ဗီဒီယို မှတ်တမ်းတွင်ပြောဆိုသွားသည်။

ထို့ပြင် အမှတ် ၁ တောင်တန်းဒေသ စီမံကိန်းမှ မြေသား ကုဗမီတာ တသန်းကျော် တူးဖော်ခဲ့ပြီး ၄.၃ ကီလိုမီတာရှိကျောက်ခင်းလမ်း၊ တံတား ၄ စင်း၊ ဥမင်လိုဏ်ခေါင်း ၃၀ ခုနှင့် ၇ ကီလိုမီတာ အကျယ်ရှိ ကျောက်ခင်းလမ်း တို့ကိုဆောက်လုပ်ပြီးစီးခဲ့ပြီး ဖြစ်ကြောင်းလည်း ပါရှိသည်။

မြစ်ဆုံရေကာတာသည် မြန်မာနိုင်ငံတွင် ဧရာဝတီ မြစ်ပေါ်ရှိ အကြီးများဆုံး ရေကာတာကြီး ဖြစ်ပြီး လျှပ်စစ်ဓါတ်အား ၆,ဝဝဝ မီဂ္ဂါဝပ် ထုတ်လုပ်မှာဖြစ်ကာ စီမံကိန်းတွင် အခက်အခဲ အနှောက်အယှက် ရှိသော်လည်း ပြီးဆုံးအောင် လုပ်ဆောင်သွားမည်ဟု အခိုင်အမာ ပြောဆိုထားသည်။

“တိုက်ပွဲတွေ ဖြစ်နေတယ်။ စစ်ပြေး ဒုက္ခသည်တွေ အိမ်ပြန်ဖို့ ထိန့်လန့်နေတဲ့ အချိန်မှာ မြစ်ဆုံ စီမံကိန်းကို အရှိန်အဟုန်မြှင့် ဆောက်လုပ်လာတာ တွေ့ရတယ်။ အစိုးရက တရုတ်တွေကို ဧရာဝတီမြစ်ကြီး ဖျက်ဆီးဖို့ လုံးဝ တရုတ် လက်ထဲ အပ်လိုက်တယ်ဆိုတာ ဗီဒီယိုဖိုင်ကို ကြည့်ခြင်းအားဖြင့်လည်း တွေ့ရတယ်။ အဲဒါကြောင့်မို့ တရုတ် အစိုးရနဲ့ မြန်မာအစိုးရကို ပြည်သူလူထုရဲ့ ဆန္ဒကို ပြန်လည် သုံးသပ်ဖို့ ဆိုးကျိုး ဖြစ်စေမယ့် မြစ်ဆုံရေကာတာကို ရပ်ဖို့ တောင်းဆိုချင်တယ်” ကချင်လူမှုဖွံ့ဖြိုးရေး ကွန်ယက်အဖွဲ့ KDNG မှ ပြောခွင့်ရသူ မအားနန်က မဇ္စျိမကို
ပြောသည်။

“သူတို့ဝဘ်ဆိုဒ်မှာလည်း အတိအလင်း ကြေငြာထားတယ်။ ဒီကုမ္ပဏီဌာနခွဲ နံပါတ် ၁၁ က အလုပ်သမားက ၇ဝဝကျော်၊ အခုက ပထမအဆုံး ဒီနှစ်အတွင်းမှာ လုပ်မယ်လို့ ပြောထားတယ်။ တရုတ် လူငယ်တွေကို ပေးနိုင်မယ် ဆိုတဲ့အကြောင်း အတိအလင်းပြောထားတယ်”ဟု သူက ထပ်ပြောသည်။

တရုတ်ကုမ္ပဏီများမှ အလုပ်သမား ၇ဝဝ ကျော်အပြင်၊ မြန်မာလုပ်သား ၂,၆ဝဝ ကျော်သည်လည်း ယင်းစီမံကိန်းတွင် ပါဝင်လုပ်ဆောင်နေကြောင်း သြဂုတ်လ ၉ ရက်နေ့ထုတ် နိုင်ငံပိုင် သတင်းစာ ဆောင်းပါး တပုဒ်တွင် ဖေါ်ပြ ထားသည်။

အတိုက်အခံ ခေါင်းဆောင် ဒေါ်အောင်ဆန်းစုကြည် အပါအဝင် ပတ်ဝန်းကျင် ထိန်းသိမ်းရေး ပညာရှင်များ၊ နိုင်ငံရေး လှုပ်ရှားတက်ကြွသူများ၊ ၈၈ မျိုးဆက် ကျောင်းသားများ၊ အနုပညာရှင်များ၊ စာပေအသိုင်းအဝိုင်း များနှင့် လူငယ် ကွန်ယက်များက မြစ်ဆုံရေကာတာ တည်ဆောက်မှုနှင့် ဧရာဝတီမြစ် ပျက်စီးမည့် စီမံကိန်းကို ရပ်တန့်ရန် ပူးပေါင်း ကန့်ကွက်နေသည့် ကြားက စီမံကိန်းကို ဆက်လက် ဆောက်လုပ်နေသည်။

ပြီးခဲ့သည့် သြဂုတ်လ ၁၁ ရက်နေ့ ဒေါ်အောင်ဆန်းစုကြည်က ဧရာဝတီမြစ်ပေါ် တည်ဆောက်ထားသော ရေကာတာကြောင့် သဘောဝ ပတ်ဝန်းကျင် ထိခိုက်မှုနှင့် တခြားဆိုးကျိုးများနှင့် ပတ်သက်ပြီး စိုးရိမ်ကြောင်း ထုတ်ပြန်ခဲ့သည်။

“စနစ်ကျသော စီမံကိန်းများ ကင်းမဲ့မှု၊ ထိန်းသိမ်းမှုဆိုင်ရာ ဥပဒေများကို လိုက်နာရန် ပျက်ကွက်မှုနှင့် သဘာဝ ပတ်ဝန်းကျင်ဆိုင်ရာ အသိပညာနှင့် ဗဟုသုတ အားနည်းခြင်းတို့သည် ပြဿနာပေါင်းစုံကို ဖြစ်ပေါ်စေခဲ့ပါသည်” ဟုလည်း ဒေါ်အောင်ဆန်းစုကြည် ကိုယ်တိုင် လက်မှတ်ထိုးထားသည့် ပန်ကြားလွှာတွင် ဖော်ပြထားသည်။

မြစ်ဆုံရေကာတာ စီမံကိန်း အစပျိုးစဉ်ကပင် မြန်မာအစိုးရ အဆက်ဆက်က မိမိတုိ့၏ အကျိုးစီးပွားကို ကာကွယ်မြှင့်တင်ရန် ပျက်ကွက်ခဲ့သည်ဟု ကချင်အမျိုးသားတို့၏ ခံယူချက်များ ပိုမိုနက်ရှိုင်းလာခဲ့သည်ဟု လည်း သူက သတိပေးထားသည်။

ဧရာဝတီမြစ် ပျက်သုဉ်းမည့် မြစ်ဆုံ ရေကာတာ စီမံကိန်းကို ကန့်ကွက်သည့် လက်မှတ်ရေးထိုး လှုပ်ရှားမှုတွင်
ပါဝင်သူ သြဇာရှိ ရုပ်ရှင်သရုပ်ဆောင် ဦးကျော်သူက “ဒါက မလုပ်သင့်ဘူး၊ မြစ် မတိမ်ကောဖို့ လုပ်ရမှာ၊ဧရာ ဝတီဆိုတာ မြန်မာပြည်ရဲ့ အသက်သွေးကြောပဲ၊ ဒါကြောင့် ဧရာဝတီမြစ် အန္တရာယ်ဖြစ်နိုင်တဲ့အတွက်စိုးရိမ် လို့ ဗမာလူမျိုး တယောက်အနေနဲ့ လက်မှတ်ထိုးတာပါ”ဟု ပြောသည်။

သြဂုတ်လ ၁၂ ရက်နေ့ သမ္မတ ဦးသိန်းစိန် အစိုးရအဖွဲ့၏ သတင်းစာ ရှင်းလင်းပွဲတွင်မူ သတင်းထောက် တဦးက စီမံကိန်းနှင့် ပတ်သက်၍ သဘာဝ ပတ်ဝန်းကျင်ဆိုင်ရာ သုတေသန လုပ်ထားမှု ရှိ၊ မရှိမေးမြန်းမှုကို ရေအားလျှပ်စစ် စီမံကိန်း ဦးစီးဌာန ညွန်ကြားရေးမှူးချုပ် ဦးကြီးစိုးမှ ဧရာဝတီ အထက်ပိုင်းကစူးစမ်းလေ့ လာပြီးပါပြီ၊ ဧရာဝတီမြစ်အောက်ပိုင်း မြစ်ဝကျွန်းပေါ်အထိ စူးစမ်းလေ့လာနေဆဲပါ”ဟု ဖြေကြားခဲ့သည်။

မြစ်ဆုံစီမံကိန်းများကြောင့် ပျက်စီးသွားမည့် ဧရာဝတီကိုကာကွယ်ရန် တောင်းဆိုနေမှုများကို အစိုးရအနေဖြင့် အလေးထားရန်နှင့် ပြန်လည် သုံးသပ်သင့်ပြီ ဖြစ်ကြောင်း လက်ရှိ ရွေးကောက်ပွဲ ပါတီများက ပြောဆိုထားချိန်
သော်လည်း စီမံကိန်းကို ဆက်လက် အကောင်အထည် ဖော်နေဆဲ ဖြစ်သည်။ သို့သော် လွတ်တော်အစည်း အဝေးတွင် ဧရာဝတီ ဖြစ်ပေါ်ဆောက်မည့် မြစ်ဆုံ ရေကာတာအကြောင်းကို တင်သွင်းမှုများ မရှိသေးပေ။

မြန်မာအစိုးရနှင့် တရုတ်အစိုးရကို ဆက်လက် အကောင်အထည် ဖော်ဆောင်မှုကို ရပ်တန့်ရန်နှင့် ပြည်တွင်း၊ပြည်သူလူထု အားလုံး ပူးပေါင်း ကာကွယ်ကြရန် မအားနန်က ထပ်မံ တောင်းဆို လိုက်သည်။

“မြန်မာပြည်သူ တရပ်လုံးကို ကျိုးဆိုးဖြစ်စေမယ့် ရေကာတာကို အဖွဲ့အစည်းတွေကိုယ်တိုင် ကန့်ကွက်နေ တဲ့ကြား က တရုတ်အစိုးရနဲ့ မြန်မာအစိုးရက ကိုယ့်နိုင်ငံ ပြည်သူလူထုရဲ့ ဆန္ဒကို လစ်လျူရှုထားတယ်ဆို တာလည်း ပြောချင်တယ်။ အခုအချိန်က အရမ်းအရေးကြီးနေတဲ့ အချိန်ဖြစ်နေလို့ အားလုံးပူးပေါင်းပြီးတော့ ကယ်တင်ရမယ်ဆိုတဲ့ အကြောင်းကိုပြောချင်တယ်”ဟု သူက မဇ္စျိမကို ပြောသည်။

ဆည်နှင့် ရေလှောင်ကန် ဆောက်မှုကြောင့် ရေလွှမ်းမိုးမှု အကျယ်အဝန်းမှာ စင်္ကာပူနိုင်ငံထက် ကျယ်ပြီးမြစ်အောက်ပိုင်းရှိ ပြည်သူလူထု သန်းပေါင်းများစွာ ထိခိုက် နစ်နာဖွယ်ရှိသဖြင့် ကာကွယ်ရန် KDNG က ထုတ်ပြန်ထားသည်။

ရေအားလျှပ်စစ် မီဂါဝပ် ၃,၆ဝဝ ထုတ်လွှတ်ပေးနိုင်မည့် “မြစ်ဆုံ ရေကာတာစီမံကိန်း” အရ မေခမြစ် အပိုင်းတွင် တာငါးခု၊ မလိခမြစ်မှာ နှစ်ခု ပိတ်ရမည် ဖြစ်သည်။ မြစ်ဆုံဆည် စီမံကိန်းမှ ထွက်ရှိသည့် လျှပ်စစ်ကို တရုတ်နိုင်ငံ သို့ ရောင်းချကာ တနှစ်လျှင် အမေရိကန်ဒေါ်လာ ၅၅၈ သန်းမှ ၅၉၇ သန်းအထိ ရှိနိုင်သည်ဟု လေ့လာသူများက ခန့်မှန်းထားကြသည်။

လက်ရှိ အစိုးရနှင့် ပူးပေါင်းကာ အေးရှားဝေါ် ကုမ္ပဏီတို့က စီမံကိန်း ပတ်ဝန်းကျင်ရှိ အိမ်ခြေ ၇ဝဝ ခန့်ကို မြစ်ဆုံဆည်အောက်ဘက် ၆ မိုင်ခန့် အကွာတွင် စံပြကျေးရွာ အဖြစ် ပြန်လည် နေရာချထားသော်လည်း စားဝတ်နေရေး အတွက် လုပ်ကိုင်စားသောက်မည့် မြေယာ မရှိခြင်းကြောင့် ဒေသခံများ အခက်အခဲဖြစ်နေ သည်ဟု မအားနန်ကပြောသည်။

Read MORE...
http://www.mizzimaburmese.com/news/inside-burma/8252-2011-09-01-11-39-06.html

ခက်ခဲပြင်းထန်သော မြစ်ကြီးနား တိုက်ပွဲ .....  ရုပ်/သံ
**********************************
http://www.youtube.com/watch?v=_WQCJHWsc2A&feature=player_embedded