မို့မို့မြင့်အောင်ရဲ့ဖော်ပြမှု၊ပေါက်သီချင်းနဲ့ ဆင်ဆာ & ငြိမ်းချမ်းရေးဆွေးနွေးသည့် KPCကိုအာဏာပိုင်များစောင့်ကြည့်နေ & လွမ်းစိမ့်

by စူ နာ မီ လှိုင်း on Friday, December 16, 2011 at 8:59pm

->  ဇာတ်ဝင်ခန်းထဲက ပေါက်သီချင်း
->  ရုပ်ရှင်ဆင်ဆာ စည်းကမ်းပြောင်းပြီ
->  မုံရွာအောင်ရှင် ပုလဲ မဲဆန္ဒနယ်မှာ ဝင်ရောက် ယှဉ်ပြိုင်ဖွယ်ရှိ
->  ပြည်ထွက်ခွင့် (Departure stamp) တံဆိပ် ခတ်နှိပ်ရန် တိုးမြှင့်တောင်းခံ

မို့မို့မြင့်အောင်ရဲ့ ဖော်ပြမှု၊ ပေါက်သီချင်း နဲ့ ရုပ်ရှင်ဆင်ဆာ
************************************

မို့မို့မြင့်အောင်ရဲ့ ဖော်ပြမှု
ပြီးခဲ့တဲ့ သီတင်းပတ်  Miss Moe Yan ၂၀၁၁ အလှမယ်ရွေးပွဲ တက်ရောက်အားပေးတဲ့ ၀ါရင့်သရုပ်ဆောင် မို့မို့မြင့်အောင်ရဲ့ ၀တ်စားဆင်ယင်မှုကအင်မတန် လုံခြုံ ပွင့်လင်းတာ တွေ့ရပါတယ်။

စင်ပေါ်က မို့မို့မြင့်အောင်


စကတ်ရှည်တဲ့အတွက် လုံခြုံတယ်လို့ ဆိုနိုင်ပေမယ့် အဲဒီစကတ် ရှေ့ပိုင်းကို ပေါင်ရင်းအထိ ခွဲထားတဲ့အတွက် ပွင့်လင်းတဲ့သဘောလည်း ဆောင်နေပါတယ်။မိုးယံ၊ ရွှေလမင်း နဲ့  မြတ်ဆုကုဋေ ထီဆိုင်က ကျင်းပတဲ့ ဒီပွဲ ရုပ်သံမှတ်တမ်းကို အင်တာနက်ပရိသတ်က ပြည်လည် ကြည့်ရှုနိုင်ပါတယ်။

အလှမယ်တယောက်ကို စင်ပေါ်တက် ဆုချီးမြှင့်ခဲ့တဲ့ မို့မို့မြင့်အောင် ခြေတလှမ်း လှမ်းလိုက်တိုင်း ပွင့်လင်းမြင်သာမှုတွေကို သိသိသာသာ တွေ့ရမှာပါ။စကပ် မည်သို့ပင် တိုစေ၊ ခွဲစေကာမူ အသားကပ်ခြေအိတ်ဝတ်ထားရင် အဆင်ပါတယ်လို့ ဆိုသူကလည်း ဆိုပါတယ်။ဒါကြောင့် အဲဒီပွဲမှာ အသားကပ်ခြေအိတ် ၀တ်ထားခြင်း ရှိမရှိ သိရှိဖို့ ဆက်သွယ်မေးမြန်းတဲ့အခါ ထပ်ဆင့်အကယ်ဒမီ မင်းသမီး မို့မို့မြင့်အောင်က “အင်တာဗျူး မပေးဘူး” လို့ ယဉ်ယဉ်ကျေးကျေး ငြင်းပါတယ်။

စင်ပေါ်တက် ဆုချီးမြှင့်တဲ့ထဲမှာ မင်းသမီး အိန္ဒြာကျော်ဇင်လည်း ပါပါတယ်။ အိန္ဒြာကျော်ဇင်ရဲ့ ဖက်ရှင်ကတော့ အများသူငါ ထူးထူးခြားခြား ပြောစရာ မရှိပါဘူး။

သီလရှင်၊ လက်ဝှေ့သမား၊ အကျဉ်းသား၊ လမ်းဘေးဈေးသည် စတဲ့ စရိုက်မျိုးစုံ သရုပ်ဆောင်ခဲ့ဖူးတဲ့ မို့မို့မြင့်အောင်ဟာ အခု အသက် ၅၀ ပြည့်ပြီးလို့ မင်းသမီးကြီးနေရာ ရောက်နေပေမယ့် လူငယ်တဦးရဲ့ ဇာတ်ရုပ်မှာလည်း ပီပီပြင်ပြင် သရုပ်ဆောင်နိုင်တုန်းပါပဲ။
ဗီဒီယို ဇာတ်ကား အများအပြားမှာ သရုပ်ဆောင်နေဆဲဖြစ်တဲ့ မို့မို့မြင့်အောင်က ရုပ်ရှင်ခေတ် အေးစက်ပြီး ဗီဒီယို ခေတ်စားချိန်တုန်းကတော့ ကားကြီးပဲရိုက်မယ်၊ ဗီဒီယိုတော့ မရိုက်ဘူးလို့ ပြောခဲ့ဖူးပါတယ်။

မင်းသမီးတယောက် ဆီးထုပ် (ဇီးထုပ်) ကြော်ငြာတွေနဲ့ ရုပ်မြင်သံကြားမှာ ပေါ်ပြူလာဖြစ်နေတုန်းကလည်း ကျမက ဆီးထုပ်ကြော်ငြာ မရိုက်ဘူး လို့  မို့မို့မြင့်အောင်က ဆိုခဲ့ဖူးပါတယ်။ဆီးထုပ်စားရင် ကျန်းမာရေးကို ထိခိုက်စေနိုင်တယ်လို့ ယုံကြည်တာကြောင့် ဒီလို အော်ချက်ထုတ်ခဲ့တာ ဖြစ်မှာပါ။ မို့မို့မြင့်အောင် ကျန်းမာပါစေလို့ ဆုတောင်းရင်း..။

ဇာတ်ဝင်ခန်းထဲက ပေါက်သီချင်း
သီချင်းတပုဒ် ပရိသတ်ထဲ ထိုးဖောက်ဝင်ရောက်သွားနိုင်မယ့် နည်းလမ်းများစွာ ရှိတဲ့ထဲမှာ ရုပ်ရှင် ဇာတ်ဝင်သီချင်းအဖြစ် သုံးရာက ပရိသတ်ကြားထဲ ရောက်သွားတဲ့ နည်းလမ်းလည်း ပါပါတယ်။ ဒီနည်းနဲ့ ဟော့သွားတဲ့ သီချင်းများစွာ ရှိခဲ့ဖူးပါတယ်။

အောင်လ ရဲ့ “တောင်းပန်တယ်” သီချင်းက နိုင်ငံတော်သီချင်း ဖြစ်နေပါပြီ တဲ့ (ဓာတ်ပုံ - ဧရာဝတီ)

ရုပ်ရှင် တကား ရိုက်တော့မယ် ဆိုရင် ဇာတ်လမ်းကျောရိုး နဲ့ သက်ဆိုင်မယ့် ဇာတ်ဝင်တေးတွေအတွက်  တေးရေးဆရာကို ချည်းကပ်ပြီး သီ;သန့် ရေးသား ဖန်တီးခဲ့ကြပါတယ်။ ဇာတ်ကားတကားကို အချိန်ပေးနိုင်မှု နည်းလာတဲ့ ဒီနေ့ခေတ်မှာ  ရုပ်ရှင်မှာရော၊ လူရွှင်တော်တွေ ထောက်ပြသလို သုံးရက်နဲ့တကား အချိန်ပေးရိုက်ကြတဲ့ ဗီဒီယိုတွေမှာပါ ပေါက်ပြီးသား တေးသီချင်းတွေကို  ပြီးပြီးရော ထည့်သွင်းလာတာ အချိန် အတော် ကြာပါပြီ။ ရလဒ်က ဒီဇာတ်ကားရဲ့ လွမ်းခန်းလည်း ဒီသီချင်း၊ ဟိုဇာတ်ကားရဲ့ အဆွေးခန်းလည်း ဒီသီချင်း ဖြစ်လာတော့တာပါပဲ။

အဲ့ဒီလို ပေါက်သီချင်းတွေကို  ဇာတ်ဝင်တေးတွေအဖြစ် အသုံးပြုရာမှာ လက်တလော လူငယ်များပါးစပ်ဖျားမှာ ရေပန်းစားနေတဲ့ အဆိုတော် အောင်လ ရဲ့ “တောင်းပန်တယ်” ဆိုရင် ပိတ်ကား နဲ့ ဖန်သားပြင်မှာရော နေရာတိုင်းမှာပါ ကြားရလွန်းလို့ နိုင်ငံတော်သီချင်းလို့တောင် ပရိသတ်တချို့က ပြောကြတာပါ။

နှလုံးသားမြို့တော်၊ မူပိုင်ချစ်သူ၊ ရင်ခွင်နန်းတော် စတဲ့ နာမည်ကျော် ဇာတ်ကားတွေအတွက် ဇာတ်ဝင်တေးတွေကို ဇာတ်လမ်းကျောရိုးကြည့်ပြီး ဖန်တီး ရေးစပ်ခဲ့တာ ဖြစ်ပါတယ်။ ဇာတ်ဝင်တေးတွေဟာ ဇာတ်လမ်း ပေါက်သလောက်  ပရိသတ်ရင်ထဲ ထိုးဖောက် သွားခဲ့တာပါ။   သီဆိုပေးထားတဲ့ အဆိုရှင်ဟာလည်း ပရိသတ်ရင်ထဲကို အလိုအလျောက် ၀င်ရောက်သွားပါတယ်။
ဒါရိုက်တာ မလိခ စိုးထိုက်အောင်ကတော့ ပေါက်သီချင်းဖြစ်ဖြစ် ဘာဖြစ်ဖြစ် သင့်တော်ရင် သုံးလိုက်တာပဲ လို့  ဧရာဝတီကို ပြောပါတယ်။
“ပေါက်ပြီးသားသီချင်းကို သုံးရမယ်လို့လည်း မဟုတ်ဘူး။ လုံးဝ မသုံးရဘူးလည်း မဟုတ်ဘူး။ တချို့ဟာတွေမှာ ပေါက်ပြီးသား သီချင်းနဲ့ လိုက်ဖက်လို့ သုံးတာမျိုးလည်း သုံးနိုင်ပါတယ်။ အမြဲတမ်းလည်း အဲ့ဒီလိုချည်းပဲ သုံးတာမျိုးလည်း မဟုတ်ဘူး။

ကိုယ့်ဘာသာလည်း တီထွင်ပြီး လုပ်သင့်တယ် ဆိုတာလည်း မှန်ပါတယ်။ ကျနော်တို့ ဗမာကားတွေမှာသာ မဟုတ်ဘူး၊ နိုင်ငံခြားကားတွေမှာလည်း ပြန်သုံးတာမျိုးတွေ ရှိပါတယ်” လို့ မလိခ စိုးထိုက်အောင်က သုံးသပ်ပါတယ်။
မိန်းကလေး အိမ်ရှေ့ အုတ်ခုံမှာ ဂစ်တာတီးပြီး သီချင်းသွားဆိုတဲ့ ဇာတ်ဝင်ခန်းမျိုး ဆိုရင်တော့ ပေါက်ပြီးသား၊ ပရိသတ် သိပြီးသား သီချင်းမျိုးကို သုံးမှ သဘာဝကျမယ်၊ အဲ့ဒီလို ဇာတ်ဝင်ခန်းမျိုးအတွက် သီချင်းအသစ်တပုဒ် ဖန်တီးမယ် ဆိုရင် အဓိပ္ပာယ် မရှိပါဘူး တဲ့။
ဇာတ်ဝင်တေးသီချင်းဟာ ကိုယ်ပိုင်သံစဉ် မဟုတ်ဘဲ ကော်ပီ ဖြစ်နေရင်တော့ အဲဒီ ဇာတ်ကားကို နိုင်ငံတကာမှာ ၀င့်ဝင့်ကြွားကြွားချပြဖို့ ခက်ခဲမှာပါ။

ဒါနဲ့ ပတ်သက်ပြီး ရန်ကုန်ထုတ် Weekly Eleven ဂျာနယ်မှာ မကြာသေးခင်က ဖော်ပြထားတဲ့ သတင်းကောင်းတပုဒ် ရှိပါတယ်၊ ရုပ်ရှင်နဲ့ ဗီဒီယိုတွေမှာ အောင်မြင်ပြီးသား တေးသီချင်းတွေကို ပြန်ပြီး အသုံးပြုတာထက် ငွေကုန်ကြေးကျခံ ဖန်တီးတင်ဆက်လာကြပြီ၊ ကိုယ်ပိုင်သံစဉ်ကို သုံးလာကြတာ ရှိနေပါပြီ တဲ့။မြန်မာ့ရုပ်ရှင်နဲ့ ဗီဒီယို လောက သူ့နေရာနဲ့သူ ဖန်တီးမှုတွေ တိုးတက်မှုတွေနဲ့ ရှင်သန်လာနိုင်ဖို့ မျှော်လင့်ရင်း..။

ရုပ်ရှင်ဆင်ဆာ စည်းကမ်းပြောင်းပြီ
မြန်မာ့ရုပ်ရှင်အစည်းအရုံးက ရုပ်ရှင်လောကအတွက် လိုအပ်ချက်တွေ၊ ပြင်ဆင်ချက်တွေကို အချိန်နဲ့တပြေးညီ ဆောင်ရွက်နေတယ်လို့ ပြောရမလိုပါပဲ။

ဆင်ဆာတင်းကျပ်မှုကို လျှော့ချပေးတယ် ဆိုတဲ့ ၀န်ကြီး ဦးကျော်ဆန်း (ဓာတ်ပုံ - ဧရာဝတီ)

မကြာမီက ရုပ်ရှင် ဆင်ဆာမူဝါဒနဲ့ ပတ်သက်ပြီး ရုပ်ရှင်အဖွဲ့သားများ စည်းဝေး တိုင်ပင်ခဲ့ကြတာ၊ ဆင်ဆာ တင်းကျပ်မှု ပြောင်းလဲတာမျိုး တွေ့ရပါတယ်။ဟုတ်ပါတယ်၊ ပြန်ကြားရေး ၀န်ကြီး ဦးကျော်ဆန်းက မူလ ဆင်ဆာ သတ်မှတ်ချက် ၁၀ ချက်ကနေ ၆ ချက်ကို ပြောင်းလဲသတ်မှတ်လိုက်ပါပြီ။ကိုယ်ကျင့်တရား ကောင်းမွန်ရေး၊ ရာဇ၀တ်မှု ပပျောက်ရေး၊ ညစ်ညမ်းမှုကင်းရှင်းရေး၊ ကလေးသူငယ်အရေး စတဲ့ အချက် ၄ ချက်ကို ဆင်ဆာစည်းကမ်းထဲက ဖြုတ်လိုက်ပါပြီ တဲ့။

နိုင်ငံရေး၊ ဘာသာရေး၊ တိုင်းရင်းသား ချစ်ကြည်ရေး၊ အမျိုးသား ယဉ်ကျေးမှု ထိန်းသိမ်းရေး၊  ရက်စက် ကြမ်းကြုတ်မှု၊ ရာဂလှုံဆော်မှု တို့နဲ့ ပတ်သက်တဲ့ အချက် ၆ ချက်ကို ဆက်လက် ပြဋ္ဌာန်းထားပါတယ်။ဒီလို ဆင်ဆာအပြောင်းအလဲနဲ့ ပတ်သက်ပြီး ဒါရိုက်တာ မင်းထင်ကိုကိုကြီးက အခုလို မှတ်ချက်ပြုတယ်။

“သူတို့ရဲ့ ပေါ်လစီဟာ တိတိကျကျ ဘယ်လိုရှိတယ် ဆိုတာ ကျနော့်အနေနဲ့တော့ သိလည်း မသိခဲ့ပါဘူး။ အခု လျှော့မယ် ဘာညာ ဆိုတဲ့ ဟာကလည်း ကျနော့အထင် ဘာမှတော့လည်း မဟုတ်ဘူး ထင်ပါတယ်။ ဒီလိုပါပဲ၊ လျှော့တယ်လို့ ပြောပြီးတော့လည်း ဟုတ်ချင်မှလည်း ဟုတ်မယ်၊ ဟုတ်ချင်လည်း ဟုတ်မယ်ပေ့ါလေ” တဲ့။

ကဲ … ဒီတခါတော့ ရုပ်ရှင်ဆင်ဆာ သတ်မှတ်ချက် အတိုးအလျှော့တွေက ဂဏန်း တကယ်ပဲ ငြိမ်သွားပြီလား၊ ဒါမှမဟုတ် ထပ်တိုး ထပ်လျှော့ဖို့ ရှိနေသေးလား ဆိုတာကို ရုပ်ရှင်လောကနဲ့  ပရိသတ်တွေထဲ မျှော်လင့်နေသူတွေရှိသလို၊ လုပ်ချင်တာလုပ် စိတ်မ၀င်စားဘူး ဆိုသူတွေလည်း ရှိနိုင်ပါတယ်။ ရုပ်ရှင်ဆင်ဆာအဖွဲ့ကြီး အမြန်ဆုံး ဂဏန်းငြိမ်ပါစေလို့ ဆုတောင်းရင်း..။

ငြိမ်းချမ်းရေး ဆွေးနွေးသည့် KPC ကို အာဏာပိုင်များ စောင့်ကြည့်မှုရှိနေ
*********************************************
ကြာသပတေးနေ့၊ ဒီဇင်ဘာလ 15 ရက် 2011 စောသိန်းမြင့် - ကေအိုင်စီ
ကရင်အမျိုးသားအစည်းအရုံး (KNU) ထိပ်ပိုင်း ခေါင်းဆောင်တချို့နှင့် ယခုလ ပထမပတ်က တွေ့ဆုံခဲ့သည့် ဘားအံမြို့ အခြေ စိုက် ကရင် ငြိမ်းချမ်းရေးကော်မတီ(KPC) ကို အစိုးရအာဏာ ပိုင်များက စောင့်ကြည့်နေသည်ဟု ကေအိုင်စီက စုံစမ်းသိရှိရ သည်။

ဘားအံမြို့၊ တောင်ကလေးပဋိပတ္တိသာသနာ့ အေးရိပ်သာ မုခ်ဦးအ၀ (Photo-KIC )

ယခုလ ဒီဇင်ဘာလ ၇ရက်နေ့က ကရင်ငြိမ်းချမ်းရေးကော်မတီ-KPC မှ KNU နှင့် ထိုင်း-မြန်မာနယ်စပ် တစ်နေရာ၌ ငြိမ်းချမ်း ရေးကိစ္စ လာရောက်တွေ့ဆုံခဲ့ပြီး နောက်ပိုင်းတွင် ယခုလို အစိုးရ အာဏာပိုင်များက မေးမြန်းစောင့်ကြည့်ခြင်း ဖြစ်သည်ဟု ဘားအံမြို့ရှိ လူမှုရေးအဖွဲ့အစည်းမှ အဖွဲ့ဝင်တစ်ဦးက ပြောသည်။

“ကျမတို့ သိရသလောက်က KPC က ငြိမ်းချမ်းရေးကိစ္စ ကေအဲန်ယူနဲ့ သွားတွေ့ပြီးနောက်ပိုင်း ဦးအောင်သောင်းက တောင်က လေး ဆရာတော်ကို ငြိမ်းချမ်းရေးကိစ္စ သွားတွေ့ရတာနဲ့ပတ်သက်ပြီး သွားမေးတယ်လို့ ကြားတယ်လေ။”ဟု ဆိုသည်။

ထိုကိစ္စနှင့်ပတ်သက်၍ KPC က လာရောက်တွေ့ဆုံသူ အာဏာပိုင်၏ အမည်ကို ထုတ်ဖော်ပြောဆိုလိုသည့် ဆန္ဒမရှိသော် လည်း လာရောက်သည်မှာ ဟုတ်မှန်ကြောင်း အမည်မဖော်လိုသူ KPC ဦးဆောင်အဖွဲ့ဝင် တစ်ဦးက ယခုလို အတည်ပြု ပြော ဆိုခဲ့သည်။

“ဟိုက (KNU)လူတွေနဲ့ တွေ့ပြီး ဒီမှာပြန်ရောက်လို့ ရက်ပိုင်းမှာပဲ သူတို့ (အာဏာပိုင်)ဘက်က လာမွှေတာက တော့ ရှိတယ်။ ဆရာတော်(တောင်ကလေး ဆရာတော်)နဲ့ တွေ့ချင်တယ်တဲ့ ပြောတယ်။”ဟု ကေအိုင်စီကို ပြောသည်။

သို့သော် လူကိုယ်တိုင် လာရောက်တွေ့ဆုံသည့် အစိုးရအာဏာပိုင်များအနေဖြင့် ဖိအားပေး ခြိမ်းခြောက်မှုများ မရှိကြောင်း လည်း အဆိုပါ KPC အဖွဲ့ဝင်က ဆက်ပြောသည်။

KPC နှင့် KNU တို့ တွေ့ဆုံခဲ့ရာတွင် KPC အနေဖြင့် သံဃာတော်နှစ်ပါး ပါဝင်ခဲ့သော်လည်း စစ်မှန်သည့် ငြိမ်းချမ်းရေးဆွေးနွေး မှု တိုးတက်စေရန်အတွက် ကြားခံအဖြစ် တတ်စွမ်းသမျှ ကြိုးစားဆက်သွယ်ကူညီပေး မှုများ ပြုလုပ်ပေးသွားမည်ဟုသာ KPC ဘက်မှ ဆွေးနွေးခဲ့ခြင်း ဖြစ်သည်။

KPC သည် စစ်မှန်သည့် ငြိမ်းချမ်းရေးလုပ်ငန်းစဉ်ကို အကောင်အထည်ဖော် ဆောင်ရွက်ရန် မည်သည့်အဖွဲ့အစည်းနှင့်မဆို တွေ့ဆုံသင့်ကြောင်း၊ ကေအဲန်ယူနှင့် တွေ့ဆုံခဲ့မှုအပေါ်လည်း လက်ခံကြိုဆိုကြောင်း ပြည်တွင်းပြည်ပရှိ ကရင်ပြည်သူများက ပြောဆိုနေကြသည်။

အိန္ဒိယနိုင်ငံရှိ စာသင်သား ကရင်ရဟန်းတော်တစ်ပါးက “စစ်မှန်တဲ့ ငြိမ်းချမ်းရေးလမ်းပေါ် လျှောက်လှမ်း နေတာပဲ။ ဖြစ်နိုင်ရင် ဦးဇင်းတို့က ပိုပြီးတောင် အားပေးရမယ်လေ။ ဘာလို့လဲဆိုတော့ ကိုယ့်အမျိုးသားရေး အတွက် တခြားလူတွေနဲ့ မညှိနှိုင်းသေး ဘဲ ကိုယ့်အချင်းချင်း တွေ့ဆုံညှိနှိုင်းတာကတော့ အသင့်တော်ဆုံးလို့ ဦးဇင်း မြင်တာပဲလေ။”ဟု သုံးသပ်ပြောဆိုသည်။

ရန်ကုန်မြို့ ခ၀ဲခြံရှိ ကရင်ပြည်သူတစ်ဦးက “ကရင်လူထုတွေအနေနဲ့ကတော့ KPC ငြိမ်းချမ်းရေးကိစ္စ တွေ့ဆုံမှုတွေ လုပ်တာ ကို ကြားရတော့ ၀မ်းသာတာပေါ့။”ဟု ပြောသည်။

ကရင်လူမျိုးများအချင်းချင်း စည်းလုံးညီညွှတ်ရေးနှင့် မြန်မာပြည်ငြိမ်းချမ်းရေးကို ရှေးရှု၍ Karen Peace Committee-KPC အဖွဲ့ကို ပြီးခဲ့သည့်နှစ်အနည်းငယ်က ဦးဆောင်အဖွဲ့ဝင် ဆရာတော် ၉ပါးဖြင့် ကရင်ပြည်နယ်၊ ဘားအံမြို့တွင် ဖွဲ့စည်းခဲ့သည်။

လက်ရှိအစိုးရသစ် လက်ထက်တွင် တောင်သာမြို့နယ်၊ ပြည်သူ့လွှတ်တော်ကိုယ်စားလှယ်ဦးအောင်သောင်း သည် ပြည် ထောင်စုအဆင့် ငြိမ်းချမ်းရေးဆွေးနွေးမည့်အဖွဲ့၏ အဖွဲ့ခေါင်းဆောင်ဖြစ်ပြီး စစ်အစိုးရ လက်ထက်က အမှတ်(၁) စက်မှုဝန်ကြီး ဌာန ၀န်ကြီးဖြစ်သည်။

ပြည်ထွက်ခွင့် (Departure stamp) တံဆိပ် ခတ်နှိပ်ရန် တိုးမြှင့်တောင်းခံ
***********************************************
ကြာသပတေးနေ့၊ ဒီဇင်ဘာလ 15 ရက် 2011 နောင့်ဒါး - ရွှေဟင်္သာ သတင်းဌာန
ကရင်ပြည်နယ် မြ၀တီမြို့မှ လူဝင်မှုကြီးကြပ်ရေးရုံးသည်၊ ထိုင်းနိုင်ငံသို့ ၀င်ရောက်သည့် မြန်မာ အလုပ်သမား များအတွက် ပြည်ထွက်ခွင့်(Departure stamp) တံဆိပ်ခတ်နှိပ် ရန်အတွက် ယခင်ကထက် (၁၀) ဆမျှ ပိုတောင်းခဲ့သည်ဟု ကိုယ်တိုင် သွားရောက် ၀န်ဆောင်ပေးခဲ့သူ တဦးက ပြောပါသည်။ ထိုအလုပ်သမား များသည်၊ ထိုင်းနိုင်ငံ၌ သဘာဝ ရေဘေးအန္တရာယ် ကျရောက် ခဲ့စဉ်က နေရပ်သို့ ပြန်ခဲ့သူများ ဖြစ်ပါသည်။

“ သတ်မှတ် နှုန်းထားကတော့ မြန်မာငွေ (၃၀၀) ကျပ်ပါပဲ ထိုင်းဘတ်ငွေ (၁၀)ဘတ် ကျော်ကျော်ပေါ့။၊ ဒါပေမယ့် အခု ချစ်ကြည်ရေး တံတားဖွင့်ပြီးတော့ အလုပ်သမားတွေ ထိုင်းကို ပိုပြီး ဝင်လာကြတယ်လေ၊ ကျွန်တော်ကိုယ်တိုင် သွားလုပ်တော့ တစ်ယောက်ကို ဘတ်ငွေ (၁၃၀)တောင် တောင်းတယ်၊ ကျွန်တော် ကလည်း အမြတ် အများကြီးရတာ မဟုတ်ပါဘူး၊ ကိုယ့်နိုင်ငံသားတွေ အဆင် ပြေစေချင်လို့၊ မသွားတတ် မလာတတ်တဲ့ လူတွေကို လိုက်လံကူညီ လုပ်ဆောင်ပေးနေတာပါ၊ အဲလောက်ထိတောင် တောင်းတာ ကတော့ တရားလွန်လွန်းပါတယ်” ဟု အမည် မဖော်လိုသူ ပွဲစားတဦးက ပြောပါသည်။

ပတ်စပိုစ့်ကိုင်ဆောင်ထားသူများ (၉၀) ရက် ပြည့် အစီရင်ခံစာရွက်ပုံ (ဓါတ်ပုံ - photoandwander)

ထိုင်းနိုင်ငံ၌ သဘာဝ ရေဘေးအန္တရာယ်ဖြစ်ခဲ့စဉ် မြန်မာအလုပ်သမား ထောင်ပေါင်းများစွာ နေရပ်ဌာနသို့ ပြန်ခဲ့ကြပါသည်။ အထူး သဖြင့်ဌာနေပြန် အလုပ်သမားများ၏ (၉၀) ရာခိုင်နှုန်း ကျော်ခန့်သည် နှစ်နိုင်ငံ အစိုးရတို့ အဆင်ပြေရန် စီစဉ်ထားသည့် မဲဆောက်-မြ၀တီ လမ်းမှတစ်ဆင့် ပြန်ခဲ့ကြပါသည်။ နေရပ်ပြန်ခဲ့ စဉ်ကမူ ထိုင်းနိုင်ငံ၏ အထွက်တံဆိပ်တုံးမပါခဲ့သည့် အလုပ်သမားများသည် ယခုပြန်လည် ဝင်ရောက် လာစဉ်၌ ထိုင်းဘက်မှ ပြည်ဝင်ခွင့် ပြန်ပေးရန် ငြင်းဆန်မှု ရှိခဲ့ပါသည်။ သို့သော် ထိုင်းနိုင်ငံရှိ မြန်မာ အလုပ်သမား အနည်းစုသာ ဌာနေသို့ ပြန်ခဲ့ခြင်း ဖြစ်ပြီး အများစုမျာ ရရာအလုပ်ကိုရှာကြံ လုပ်ကိုင်ကာ ထိုင်းနိုင်ငံ၌ ဆက်လက် ရပ်တည်ခဲ့ကြပါသည်။

“အဲဒီ အဖြစ်အပျက်တွေကို အထက်က ဦးစီးမှူးတွေ မသိကြပါဘူး၊ သူတို့က သူတို့ အလုပ်နဲ့ပဲ သူတို့ ရှုပ်နေကြတာ၊ ကျွန်တော်တို့လို ပွဲစားတွေတောင်မှ ဦးစီးမှူးတွေဆီကို မပေါက်ပါဘူး၊ ကိုယ်တိုင် လုပ်တဲ့ လူတွေဆိုရင် ဝေးရောပေါ့၊ အောက်ခြေဝန်ထမ်း တွေနဲ့ပဲ တွေ့ရတာ၊ အခု အဲဒီ အောက်ခြေဝန်ထမ်းတွေက အကွက်ရှာပြီး လာဘ်စားနေကြတာ၊ ဦးစီးမှူးတွေ ပြောသံ ကြားတာကတော့ တရားဝင် နှုန်းထားက မြန်မာငွေ (၃၀၀) ကျပ်ပါပဲတဲ့၊ လွန်ခဲ့တဲ့ (၁၇) လ ကတည်းက ဒီနှုန်းထားနဲ့ သတ်မှတ်ထားတာတဲ့၊” ဟု ၄င်းပွဲစားက ဆက်လက် ပြောပြပါသည်။

ပတ်စပိုစ့်ကိုင်ဆောင်ထားသူများ (၉၀) ရက် ပြည့် အစီရင်ခံစာရွက်ပုံ (ဓါတ်ပုံ - photoandwander)

ပြီးခဲ့သည့် နိုင်ဝင်ဘာလ (၃) ရက်နေ့၌ ရေဘေးခံ မြန်မာအလုပ်သမားများ နေရပ်သို့ အလွယ်တကူ ပြန်နိုင် ရန်အတွက် သက်ဆိုင်ရာ ထိုင်း-မြန်မာ အာဏာပိုင်တို့မှ ညှိုနှိုင်းပြီး မြ၀တီချစ်ကြည်ရေး တံတားအား ခေတ္တမျှ ဖွင့်ပေး ခဲ့ပါသည်။ သို့သော်လွန်ခဲ့သည့် ဒီဇင်ဘာ (၅) ရက်နေ့ ထိုင်းဘုရင် မင်းမြတ်၏ မွေးနေ့၌ ထိုင်း-မြန်မာ နှစ်နိုင်ငံကြား ဆက်သွယ်ထားသည့် (၁၇) လကျော်ကြာ ပိတ်ထား ခဲ့သည့် မဲဆောက်-မြဝတီ ချစ်ကြည်ရေး တံတားအား တရားဝင် ပြန်လည် ဖွင့်လှစ်ပေးခဲ့ပါသည်။  မြဝတီလမ်းမှတစ်ဆင့် မဲဆောက်၊ ထိုင်းနိုင်ငံသို့ ဝင်ရောက်သူ မြန်မာနိုင်ငံသား အလုပ်သမားများမှာ တစ်နေ့လျှင် အနည်းဆုံး (၄၀၀) ဦးခန့် ဝင်ရောက်လျက် ရှိသည်။ ချစ်ကြည်ရေးတံတား စတင် ဖွင့်လှစ်ပေးခဲ့သည့် နေ့၌ (၂၀၀၀) ဦးအထိ ဝင်ရောက်ခဲ့ကြောင်း သိရပါသည်။

ထိုင်းနှင့် မြန်မာအစိုးရတို့၏ နှစ်နိုင်ငံ နားလည်မှု စာချွှန်လွှာအရ ထိုင်းနိုင်ငံသို့ မြန်မာနိုင်ငံသား အလုပ် သမားများအား MOU အစီအ စဉ်ဖြင့် တင်သွင်းရန် ရှိနေပါသည်။ သို့ သော်လည်း ယနေ့အထိ အရေအတွက် မည်မျှ တင်သွင်းပြီးကြောင်းနှင့် မည်မျှ ဆက်လက် တင်သွင်းရန် ကျန်ရှိနေသေးသည်ကို နှစ်နိုင်ငံ အစိုးရများမှ တရားဝင် ထုတ်ပြန်ခြင်း မရှိသေးပေ။

" လွမ်းစိမ့် ... "
**********

မေငြိမ်း  -  ဒီဇင်ဘာ ၁၆၊ ၂၀၁၁

အဲဒီနေ့က……

စဉ့်အုတ်ကွက်ရွှေညိုရောင်နံရံတွေကြားထဲ ပြန်ရောက်သွားတာပေါ့။ လှေကားလေးတွေကို နံရံထဲမှာ ကပ်မြှုပ်လို့..။ အဲဒီအဆောက်အဦးတွေကိုက ရင်ခုန်ကြည်နူးစရာကောင်းတာလေ..။ အဲဒီ လှေကားရင်းကော်ရစ်ဒါတွေမှာ ချစ်သူကျောင်းသူလေးတွေကို စောင့်နေတဲ့ ကျောင်းသားလေးတွေ ရှိတတ်တယ်..။ လှေကားတွေပေါ်ကနေ စကားတပြောပြောနဲ့ ရယ်မောဆင်းလာကြတဲ့ ဆရာဆရာမတွေ ရှိမယ်….။ အဲဒီလှေကားလေးတွေ.. ကော်ရစ်ဒါတွေပေါ်မှာပဲ ချစ်စကားတွေ လိုက်ပြောခဲ့ကြ… လက်ကမ်းကဗျာစာအုပ်တွေ လိုက်ရောင်းခဲ့ကြ… လက်ကမ်းလှုံ့ဆော်စာတွေ ဖြန့်ခဲ့ကြ… အကြောင်းမျိုးစုံနဲ့ ငိုခဲ့ကြ.. ရယ်ခဲ့ကြ.. ပျော်ခဲ့ကြ…။

ပြီးတော့ စားသောက်တန်းမှာဆို ခိုင်ထူးတို့ စိုင်းထီးဆိုင်တို့ ခင်မောင်တိုးတို့ သီချင်းတွေနဲ့ လတ်လတ်ဆတ်ဆတ် ထွက်ထားတဲ့ သီချင်းသစ်လေးတွေ ပျံ့လွင့်နေလိမ့်မယ်…။ စားသောက်ဆိုင်လေးတွေမှာ ရှက်စနိုးနဲ့ ပြုံးနေကြ… စိတ်ကောက်ရန်ဖြစ်နေကြ.. ခုမှ ချစ်စကားပြောနေ ကြတဲ့ ချစ်သူစုံတွဲတွေ.. တရုန်းရုန်းနဲ့ ကဗျာစာအုပ်လုပ်နေကြတဲ့ သူငယ်ချင်းအုပ်စုတွေ…။ အချိန်လုပြီး မုန့်စားကြရင်း ဟိုငေးဒီငေးလုပ်နေတဲ့ ကျောင်းသူ ကျောင်းသားတွေ… ရှိမယ်။

အားလုံးဟာ ရသကိုးပါးကို ခံစားရသလို ခံစားလို့ မြိန်ခဲ့ကြ…။ ဒါပေမဲ့ အဲဒီ စဉ့်အုတ်ရွှေညိုရောင်ကျောင်းကလေးပေါ်မှာ စစ်ဝတ်စုံတွေတော့ မလွှမ်းမိုးဖူးခဲ့ဘူး..။ ယုံလား..။

အဲဒါ RC 2 လို့ခေါ်တဲ့ လှိုင်နယ်မြေကောလိပ်လေးပေါ့။

အဲဒီကျောင်းလေးကို ကျောင်းသူဘ၀နဲ့ အလည်အပတ်သွားနေခဲ့တာ ထည့်မပြောဘဲ ဆရာမပေါက်စဘ၀နဲ့ နေခဲ့သမျှ ၁၀နှစ်တာကာလမှာတောင် ဘယ်လောက် ချစ်ခဲ့.. စွဲလန်းခဲ့သလဲဆို… ခုပြန်တွေးသတိရတော့ လွမ်းရတဲ့ စိတ်က တစိမ့်စိမ့်….။

+++++++++

တိုင်လုံးဖြူဖြူကြီးတွေကို ဖြတ်ပြီး နေ့တိုင်းသွားနေကျ… ။ တခါမျှ မော့မကြည့်မိတဲ့နေ့ရယ်လို့မရှိ။ အဲဒီတိုင်ကြီးတွေကို ကြည့်တိုင်း စိတ်ထဲ အားရှိတာ။ တကယ်တော့ ဒီဝင်းက ကိုယ်နဲ့ တိုက်ရိုက် ပတ်သက်တာတော့လည်း မဟုတ်…။ ကံကောင်းလို့ ချစ်စရာစွယ်တော်ရိပ်မှာ နေခွင့်ရခဲ့တာ။ ဒီမှာလည်း ၁၀နှစ်ပဲ..။ ၁၀နှစ်လုံးလုံးမှာ… တိုင်လုံးကြီးတွေကို ချစ်ခဲ့သလို နံဘေးက စွယ်တော်ပင်ပုလေးတွေကို လည်း ချစ်ခဲ့။ ဗိသုကာဌာနဆီဆင်းမယ့် ပေါင်းမိုးလှေကားလေးကိုလည်းချစ်ခဲ့။

ဂျီဟောရှေ့က ဖြတ်လျှောက်တိုင်း စာရေးဆရာမ မစန္ဒာရဲ့ ဂျီဟောသူကို သတိမရမိတဲ့နေ့ မရှိ။ ကိုယ်တိုင် ဂျီဟောကို ကြည့်ပြီး တူနှစ်ကိုယ် ဆိုတဲ့ ၀တ္ထုတိုတပုဒ်ရေးခဲ့ဖူးတာလည်း သတိရပါ့။ မှောင်အုံ့အုံ့ သီရေတာတွေနား သရဲကြောက်လို့ ဖြတ်မလျှောက်ရဲခဲ့တာလည်း ခုကျတော့ လွမ်းစရာ။ ကင်တီးကိုတော့ သတိမရချင်ဆုံးပါပဲ။ အိမ်မှာ ပျင်းတိုင်း ကင်တီးဘက်ဆီလျှောက် နွေးအေး.. မေတ္တာပေါင်းကူး.. မော်လမြိုင်ဆိုင်။ မိန်းကလေးနည်းနည်း ယောက်ျားလေးများများကျောင်းဆိုပေမဲ့ ကင်တီးလို တကယ့် စည်ပေ့ ဆူပေ့ဆိုတဲ့နေရာကနေ အကြိမ်များစွာ ဖြတ်လျှောက်ခဲ့ဖူးသမျှ တခါမှ ကာယိနြေ္ဒမဲ့အောင် အစအနောက်ခံရတာမျိုး မရှိဖူးခဲ့တာမျိုးက ရှားရှားပါးပါးပါ။ တခါမျှလည်း ကင်တီး အစအဆုံး ဖြောင့်အောင် မလျှောက်ခဲ့ရဖူးတာလည်း မှတ်မှတ်ရရ.. ။ တဆိုင်ဆိုင်ထဲကနေ လှမ်းခေါ်တဲ့ သူငယ်ချင်းတွေ.. အကိုလို မောင်လို မိတ်ဆွေတွေနဲ့ ကြုံသလိုဝင်ထိုင် လေပစ်ရင်း ပျော်ပျော်ကြီး ခရီးဖင့်နေကျ..။ ကွေး.. ကိုလွင်.. ဇာတာကြီး.. မောင်အံ့.. ချိုတူးဇော်.. ဗလ.. ပုတ်သင်ချို…

ဘယ်တော့မှ ပြန်မရနိုင်တော့တဲ့အချိန်တွေ….

+++++

ဟော.. ဒီနေရာလေးမှာပေါ့.. လူအုံအုံ အုံအုံ နဲ့ Catoon Box လေး ရှိခဲ့တာ… ဟော.. သြဘာလမ်းရော ဘယ်နားမှာလဲ.. နောက်တော့ Lover’s Lane… ။ အစားထိုးမရနိုင်တဲ့ နေရာတွေ…။ ဘယ်မှာလဲ…။ ပြီးတော့ ၈၈ မတ်လရဲ့ ညတုန်းက ကြယ်တပွင့်ကြွေခဲ့ရာ ပင်မရင်ပြင်ကြီး…။ ဆင်းရဲသားဂိတ်နားက အထိမ်းအမှတ်နေရာလေး..။ အဲဒါလေးတွေပဲ ပြန်မြင်ချင်ပါသေးတယ်..။ အဲဒီနေရာလေးတွေကို စိတ်မှန်းနဲ့ပဲ လွမ်း….။

တကယ်ဆို အဲဒီ နေရာတွေမှာပဲ .. အဲဒီ အမိစက်မှုတက္ကသိုလ်ရင်ခွင်မှာပဲ ၈၈နောက်ပိုင်း ကျောင်းသားတွေရဲ့ ဘ၀တွေ အသစ်တဖန် ပြောင်းပြန် စခဲ့ကြရတာ..။ ဒါကြောင့်ပဲ ထင်ပါရဲ့ .. ခုချိန်ထိ.. အဲဒီကျောင်းတော်ကြီးခမျာ မေ့လျော့ ပျောက်ပျက်အောင်.. ဖျောက်ဖျက်ဖို့ အမျိုးမျိုး ကြိုးစားလုပ်ကြံခံခဲ့ ရတာ…။ ခုချိန်ထိ……

++++++

လွမ်းစိမ့်..တဲ့။

စက်မှုတက္ကသိုလ်.. တဲ့။

RC 2 တဲ့။ ဒါရိုက်တာချိုတူးဇော်က ပြောပါတယ်..။

ဟင့်အင်း..

ကျမသိပါတယ်….

ဒါရိုက်တာ ပြောလို့သာ ကျမတို့ ကြံဖန်ပြီး RC 2 လိုက်ရ.. RIT လိုက်ရပေမဲ့..

ကျမရင်ထဲ တကယ်ရောက်ရောက်သွားတာက တချိန်တုန်းက ပုံရိပ်ဟောင်းတွေ.. ။

ဒါရိုက်တာ ကြိုးစားတုပြထားရှာတဲ့ RC2 နဲ့ နွေးအေးတွေ.. မေတ္တာပေါင်းကူးတွေ..ထွန်းနွားနို့ဆိုင်

ပုံရိပ်တွေက ကျမကို အလွမ်းမပြေစေခဲ့ပါ…။

ဒီရုပ်ရှင်ကို ကြည့်ရင်း ဂျပ်ဆင်ထိပ်က လရိပ်ပြာကိုလည်း ကျမ သတိရနေသေးတာပါ…။

အနှစ် ၂၀စာအလွမ်းတွေ….

ခုဆို ၂၃နှစ်စာ….

ကျမတို့အနားက ပျောက်သွားတဲ့ RC 2 လို.. Main လို.. RIT လိုပါပဲ…။

ကျမတို့ရဲ့ သူငယ်ချင်းတွေ… တောတွေ တောင်တွေထဲ…။ ထောင်တွေ တန်းတွေထဲ…။ နာနာကျင်ကျင် ကြေကြေကွဲကွဲ .. ဘယ်သူမှ မပျော်ရွှင်ကြရတဲ့ ဘ၀တွေထဲမှာ…။ တစစီ ပြတ်လိမ့်သွားတဲ့ ပုလဲကုံးလို…။ တန်ဖိုးကြီးပါလျက်နဲ့ ပြိုပျက် လွင့်ပျောက်ကြရ…။ ခုထိ.. ခုထိ.. ဘာတခုမှ အလျော်ပြန်မရသေးတဲ့ နှစ်၂၀ကျော်ကာလက..။ ရှည်ရှည်လျားလျား မင်းမူဆဲ…။

ဒါရိုက်တာချိုတူးဇော်က လွမ်းစိမ့်… တဲ့။

သူက ပြောဖူးပါတယ်..။

မြန်မာစကားမှာ  နေစိမ့် တယ်ဆိုတာ ရှိတယ် မဟုတ်လား…..

ကျွန်တော်ဟာ . . .

ကြီးတောင့်ကြီးမားနဲ့

လွမ်းစိမ့် သူပါဗျာ… တဲ့။

မြန်မာစာအရကတော့…

လွမ်းစိမ့်ဆိုတာ.. လွမ်းစေအံ့.. လို့ အဓိပ္ပါယ်ရပါတယ်။

ဒါမှမဟုတ်… တစိမ့်စိမ့်လွမ်းရတာလား…။

ကျမအတွက်တော့ နှစ်မျိုးစလုံးထိ အဓိပ္ပါယ်သွားတဲ့ စကားလုံးလေးပါ….

ကျမတို့တတွေ…

တစိမ့်စိမ့်နဲ့ တသက်စာ လွမ်းစေရအောင်….

လွမ်းစိမ့်က ပြုစားခဲ့ပါတယ်။

မုံရွာအောင်ရှင် ပုလဲ မဲဆန္ဒနယ်မှာ ဝင်ရောက် ယှဉ်ပြိုင်ဖွယ်ရှိ
**************************************
ကိုပေါက် | သောကြာနေ့၊ ဒီဇင်ဘာလ ၁၆ ရက် ၂၀၁၁
နယူးဒေလီ (မဇ္ဈိမ) ။         ။ လာမည့် ကြားဖြတ်ရွေးကောက်ပွဲတွင် လစ်လပ်နေရာ တခုဖြစ်သည့် စစ်ကိုင်းတိုင်း၊ ပုလဲမြို့နယ် ပြည်သူ့လွှတ်တော် မဲဆန္ဒနယ်အတွက် အမျိုးသား ဒီမိုကရေစီ အဖွဲ့ချုပ် NLD မှ မုံရွာအောင်ရှင် ဝင်ရောက် ယှဉ်ပြိုင် အရွေးခံဖွယ်ရှိကြောင်း သိရသည်။

ထိုသို့ ပါဝင်ယှဉ်ပြိုင်ရန် အဆိုပြုချက်များ ရှိထားသော်လည်း ပါတီဗဟိုမှသာ ဆုံးဖြတ်ပေးမှာ ဖြစ်ကြောင်း နိုင်ငံရေး အကျဉ်းသားဟောင်း တဦးဖြစ်သည့် မုံရွာအောင်ရှင်က မဇ္ဈိမကို ပြောသည်။

“ပြောနေကြတာပေါ့။ ကျနော်ကတော့ တိတိကျကျ မပြောချင်သေးဘူးဗျ။ အဆိုပြုထားတာတော့ ရှိပါတယ်။ ဗဟိုမှာ ဆုံကြတော့ လစ်လပ်တယ်ဆိုတော့ လုပ်ဖို့ တိုက်တွန်းကြတာတွေ ရှိတယ်။ ဗဟိုကပဲ ရွေးမယ်လို့ ပြောတာကိုး။ ကျနော်က ကြိုပြီးတော့ မပြောချင်သေးဘူး။ လူကြီးတွေက တာဝန်ပေးရင် ယူရမှာပါပဲ” ဟု ပြောသည်။

ကြားဖြတ်ရွေးကောက်ပွဲတွင် လစ်လပ်နေရာတခုဖြစ်သည့် စစ်ကိုင်းတိုင်း၊ ပုလဲမြို့နယ် ပြည်သူ့လွှတ်တော် မဲဆန္ဒနယ်အတွက် NLD မှ မုံရွာအောင်ရှင် ၀င်ရောက်ယှဉ်ပြိုင် အရွေးခံဖွယ်ရှိ

NLD အနေဖြင့် ကြားဖြတ်ရွေးကောက်ပွဲတွင် လစ်လပ် ၄၈ နေရာလုံး ဝင်ရောက် ယှဉ်ပြိုင်မည်ဟု ဆိုထားရာ ပုလဲမြို့နယ်တွင် ကြံ့ခိုင်ရေးပါတီနှင့် အဓိက ယှဉ်ပြိုင်ရမည် ဖြစ်သည်။

ကြံ့ခိုင်ရေးပါတီ ကိုယ်စားလှယ်အဖြစ် ပြန်ကြားရေး ဝန်ကြီး ဦးကျော်ဆန်း၏ညီ ဦးဌေးနိုင် ဝင်ရောက် ယှဉ်ပြိုင်မည် ဟုလည်း သတင်းများ ထွက်ပေါ်နေရာ ယှဉ်ပြိုင်ရာတွင် NLD အနိုင်ရရေး အတွက် များစွာ ကြိုးပမ်းရမည် ဖြစ်
ကြောင်းလည်း ဦးအောင်ရှင်က “ဗိုလ်မှူးချုပ် ကျော်ဆန်းရဲ့ နယ်မြေဆိုတော့ တော်တော်လေး လုပ်ထားတာတွေ ရှိတယ်ဗျ။ ကျောင်းဆောက်တာတို့၊ စာကြည့်တိုက် ကိစ္စတွေ၊ လမ်းပန်း ကိစ္စတွေ၊ လတ်တလော လက်လုပ် လက်စားတွေကို ငွေချေးတာတွေပေါ့။ ကျနော်တို့က ဝင်ပြီးယှဉ်ပြိုင်မယ်ဆိုရင် တော်တော်ပြန်လုပ်ရမှာဗျ။ ဒါကြောင့် ပုလဲကို ကျနော် တော်တော်အာရုံစိုက်တယ်။ ပုလဲက တော်တော်လုပ်ရမယ်” ဟု ပြောသည်။

သို့သော် ၁၉၉၀ ရွေးကောက်ပွဲတွင် ၂၆ နှစ်တာ တည်ဆောက်ထားသော လမ်းစဉ်ပါတီ တဖြစ်လဲ တိုင်းရင်းသား စည်းလုံးညီညွတ်ရေးပါတီ (တစည)နှင့် ယှဉ်ပြိုင်ရာတွင် NLD အနိုင်ရခဲ့ဖူးကြောင်း အိန္ဒိယနိုင်ငံရောက် ၁၉၉၀ NLD လွှတ်တော်ကိုယ်စားလှယ် ဒေါက်တာတင့်ဆွေက မဇ္ဈိမကို ပြောသည်။

“သူတို့က ၂၆ နှစ် တည်ဆောက်ထားသော်လည်းဘဲ ပုလဲ မဲဆန္ဒရှင်တွေဟာ NLD ကို ပုံအောပြီး မဲပေးကြလို့ အမှတ် ၁ ရော၊ အမှတ် ၂ ရော ကျနော်တို့ နိုင်ပါတယ်။ ခုတခါကတော့ ကျနော်တို့ ၁၉၉၀ ကိုယ်စားလှယ် နှစ်ဦးလုံး ကလည်း မဲဆန္ဒနယ်မြေမှာ မရှိကြတော့ ကြံ့ခိုင်ရေးပါတီက တည်ဆောက်ခွင့် ရသွားတယ်ပေါ့။ ခပ်ရိုင်းရိုင်းပြော ရရင် ကြံ့ဖွံ့က ပွဲလန့်တုန်း ဖျာခင်းခဲ့တာလို့တောင် ပြောချင်ပါတယ်” ဟု ပြောသည်။

ပုလဲတွင် အခြားမည်သည့်ပါတီများ ဝင်ရောက် ယှဉ်ပြိုင်မည်ကို မသိရသေးသော်လည်း ကြံ့ခိုင်ရေးနှင့် NLD အကြိတ်အနယ် ယှဉ်ပြိုင်ကြရမည့် မဲဆန္ဒနယ်မြေတခု ဖြစ်ကြောင်းလည်း ဒေါက်တာတင့်ဆွေက “၂၀၁၀
 ရွေးကောက်ပွဲတုန်းက ရွေးကောက်ခံထားရတဲ့ ဦးကျော်ဆန်းကလည်း သူ့ရဲ့လွှမ်းမိုးမှုတွေ၊ သြဇာအာဏာတွေနဲ့ တည်ဆောက်ထားတယ်လို့ ယုံကြည်ပါတယ်။ သို့သော်လည်း ပုလဲမဲဆန္ဒရှင်တွေဟာ မှန်ကန်တဲ့ နိုင်ငံရေး လမ်းကြောင်းကို ရွေးနိုင်ကြလိမ့်မယ်လို့ ယူဆပါတယ်။ အကြိတ်အနယ် နှစ်ဖက်လုံးက ကြိုးစားကြလိမ့်မယ်လို့ ယူဆတဲ့အတွက် ဒါဟာ အင်မတန်မှ ကြည့်ကောင်းတဲ့ နိုင်ငံရေးပွဲတပွဲ ဖြစ်ပါလိမ့်မယ်” ဟု ပြောသည်။

ဒီဇင်္ဘာ ၂ ရက်နေ့က ကျင်းပခဲ့သည့် စစ်ကိုင်းတိုင်း NLD အစည်းအဝေးတွင် ရွေးကောက်ပွဲ အောင်နိုင်ရေး တိုင်းကော်မတီအား အယောက် ၃၀ ကျော်ဖြင့် ဖွဲ့စည်းခဲ့ကြပြီး မုံရွာခရိုင် အောင်နိုင်ရေး ကော်မတီကို စနေနေ့တွင် ဖွဲ့စည်းကြမည် ဖြစ်သည်။ ပုလဲမြို့နယ်မှာ မုံရွာခရိုင်အတွင်း ပါဝင်သည်။

၂၀၁၂ ဇန်နဝါရီလဆန်းပိုင်းတွင် NLD ကိုယ်စားလှယ်လောင်းများနှင့် ဝင်ရောက်ယှဉ်ပြိုင်မည့် မဲဆန္ဒနယ်များ စာရင်းအား ဗဟိုမှ ထုတ်ပြန်နိုင်ဖွယ်ရှိပြီး ရွေးကောက်ပွဲကိုမူ ဧပြီလဆန်းလောက်တွင်မှသာ ကျင်းပနိုင်ဖွယ်ရှိ
ကြောင်း ဦးအောင်ရှင်က ခန့်မှန်းပြောဆိုသည်။

ကဗျာဆရာတဦးဖြစ်သူ မုံရွာအောင်ရှင်အား ၂၀၀၀ ခုနှစ်တွင် စစ်အစိုးရက ဥပဒေပုဒ်မ သုံးခုဖြင့် တရားစွဲဆိုခဲ့ပြီး
ထောင်ဒဏ် ၂၁ နှစ် ချမှတ်ခဲ့ရာ ထောင်အတွင်း ၉ နှစ်နှင့် ၅ ရက် ကျခံခဲ့ပြီး ၂၀၀၉ စက်တင်ဘာ ၁၈ ရက်တွင် လွတ်ငြိမ်း ချမ်းသာခွင့်ဖြင့် ပြန်လည် လွတ်မြောက်လာခဲ့သည်။